Kum 12 hnuah Manchester United chuan FA Cup an chawi leh ta a, vawi 12 ngawt Man Utd hian FA Cup title an la ta a ni.
FA Cup-ah hian Arsenal chu vawi 12 champion tawhin, an record hi Manchester United chuan an nihrual ta chiah a ni. Wembley Stadium-a FA Cup Final vawi 135-naah hian Crystal Palace chuan Puncheon hmangin season half hun tawp lamah hma an hruai a.
He goal hi hun tawp dawn minute 9 la awmin Mata chuan United tan a rul. Hun pangngaiah 1-1 in an inhnehtawk a, extra time first half tawp dawnah Smalling chuan yellow card pahnihna chawiin hnawhchhuah a ni. Minute 15 chhung kim lovin United khel mahse bench atanga lut Lingard chuan extra time second half-ah goal a khung a, 2-1 in Man Utd chuan hnehna an chang ta a ni.
Manchester United-in FA Cup title an lak avang hian Premier League-a 7-na West Ham chuan Europa League an khel ve thei dawn ta a, Man Utd leh Southampton-te chuan season tharah Europa League Group stage atangin an tan anga, West Ham erawhin play-off an khel phawt dawn a ni. Guus Hiddink leh Ruud Gullit-te hnung zuiin Van Gaal chu Dutch coach zinga FA Cup chawi thei pathumna a ni ta a ni.
Crystal Palace 1-2 Manchester United
(Puncheon 78') (Mata 81', Lingard 109')
Red Card : Smalling 105' (Man Utd)
Palace XI : Hennessey; Ward, Dann, Delaney, Souare; Zaha, Cabaye, McArthur, Jedinak, Bolasie; Wickham.
Subs : Speroni, Kelly, Mariappa, Sako, Puncheon, Gayle, Adebayor.
Man Utd XI : De Gea, Valencia, Smalling, Blind, Rojo, Carrick, Fellaini, Mata, Rooney, Martial, Rashford
Subs : Romero, Darmian, Jones, Schneiderlin, Herrera, Young, Lingard
Goal hmasa ber hi 78 mins-a lut a ni a, Palace chuan corner petin, Fellaini chuan a tauh chhuak a, hei hi Ward chuan mual veilam sirah vawrh lehin, Jason Puncheon chuan box chhung veilam atangin kawh zetin a pet goal ta a ni. Palace-in hma an hruai rei lo, 81 mins-ah Rooney leh Fellaini thawhrah Mata chuan a tel a.
Rooney chuan box chhung dinglam sirah ball a tlanpui a, far post-a awm Fellaini tan vawrhin, Fellaini chest thlak chu lei a thlen hmain Mata chuan a volley a, Ward-a kapkarah goal ta a ni. Hun pangngai a zova, 1-1 in an inhnehtawk. Extra time 105 mins-ah Smalling chuan yellow card pahnihna chawiin hnawhchhuah a tawk. Extra time second half 109 mins-ah bench atanga lut Lingard chuan United chakna goal mawi takin a khung.
Box dinglam sir atanga Valencia cross chu Damien Delaney chuan clear tum mahse box a pel lo, hei hi Lingard chuan volley nghalin, top corner-ah mawi takin a thlawk lut a, United chuan 2-1 in hnehna an chang a, FA Cup champion an ni ta a ni.
He match-ah hian goal mouth action a awm nual a, Fellaini chuan Rashford thai kawi chu shot-in Palace goal cross bar a per a. Martial pawhin Palace goal ban a tauh per bawk a ni. Mata pawhin first half-ah chance tha tak box chhung atangin a nei a, Palace goalkeeper Hennessey chuan a lo dan sak a ni.
Palace tan Zaha a tal na hle a, United defender te tan buaipui tham a ni. Bolasie pawhin chance tha tak vawi hnih a nei a, De Gea chuan Bolasie hi a lo dang ve ve a ni. Smalling hnawhchhuah a nih hnuah Palace hian hma hruaina goal khungna chance tha tak Gayle hmangin an nei a, . Gayle chuan Zaha through ball umin, box chhung atangin a shot chu De Gea chuan a kein a lo dang, kha kha game ti danglam tu a ni kan ti thei awm e.
Van Gaal chuan season khat dang United-ah contract la nei mahse FA Cup title chuan a dinhmun a chhanhim zo dawn ta chuang lo niin a lang ta. Champions League an khelh phak loh avang khan Man Utd hotute chuan coach thlak an duh niin bbc chuan a tarlang a. December thlaa Chelsea-in an ban tak Jose Mourinho chu hun rei tak atan an lo be tawh nia ngaih a ni a, Mourinho hian a thuphungin United nen inremna a lo neih pui tawh bawk niin bbc chuan a tarlang. Karleh hian Mourinho chu Man Utd manager thar a ni mai tawh dawn niin media te chuan an tarlang a ni.
Pictures Credit : Reuters