World Test Championship Final chu June ni 18, 2021 hian India sana tlailam dar 3 hian England, Southampton-a awm The Ages Bowl Cricket Stadium-ah khelh tan a ni dawn a, final khel tur India leh New Zealand te pawn inbuatsaihna tha tak neiin, inkhel hmuhnawm tak kan hmuh ngei a beiseiawm.

Test Match hi ni nga chhung khelh thin niin, final hi June ni 18 atanga ni 22 thleng khelh a ni anga, ni nga  chhunga  chak zawk awm lova an inhnehtawk chuan ‘Joint Winner’ a puan an ni ang. Final bik atan hian reserve day atan ni khat  (June ni 23)  dah a ni a, ruahsur leh harsatna dang avanga inkhelh tur hun chhung nia inkhelh theih loh a awm chuan reserve day  hi hman tur a ni.

Test match bik hi International Cricket Council hnuai a Cricket in elna pathum zinga ngaih ropui ber leh Upa ber ni mahse, World Test Championship bik erawh a vawikhat na atan August ni 1, kum 2019  atang khan khelh tan niin, kum hnih chhungin Test Match khel thin ram te’n Test match hrang hrang an khelh atanga an point hmuh atangin a sang pahnih India leh New Zealand –te chuan final hi an khel dawn a ni. 

India hi World Test Championship Table ah hian pakhatna an ni a, New Zealand hi pahnihna niin, Test Ranking-ah erawh New Zealand hi pakhatna an ni a, India hi pahnihna an ni thung.

Tunhnaiah India cricket  team hi an che tha hle a, Australia chu anmahni ram ngeiah zu hnehin, chumi hnuah England pawh India ramah an  sawp leh a, Virat Kohli a kaihhruai India team hi an inrintawkna a sang hle ang. Kane Williamson a kaihhruai New Zealand team pawh England khel mualah England team hneh zo hlim an ni a, an phur vanglai tak a nih a rinawm bawk.

India leh New Zealand bik hi Test Match vawi 59 khel tawh in India hi vawi 21 an chak tawha, New Zealand hi vawi 12 an chak tawh ve tawh bawka, , match 26 an inhnehtawk a ni.