Title race-ah Arsenal pawh an tawlhthlu tlat mai. Pathianni zan khan Emirates Stadium-ah Aston Villa an mikhual a, mikhual team-in si hnih faiin hnehna an chang.
Pathianni zan zan tir lamah Liverpool chu Crystal Palace lakah an tlawm. Arsenal tan point thuma Liverpool tlansan theihna hun tha a thleng. Tin, chak ngat selang chuan Manchester City khumin league hmahruaitu an ni leh dawn.
Mahse hun tawp dawn lama Bailey leh Watkins te goal hmangin Emirates Stadium-ah Aston Villa an chak a, Manchester City chuan khelh 32 atangin point 73 an nei a, Arsenal leh Liverpool te chuan point 71 ve ve an nei a, hmahruaitu hi point 2-in an phak lo.
Emirates Stadium-a inkhel hmuhnawm takah Aston Villa-in chak an phu kan ti thei awm e. First half-ah Watkins Ollie Watkins chuan Arsenal goal post a pet per. Second half-ah Youri Tielemans pawhin Arsenal goal bar a pet per bawk.
Hun tawp lam minute 84-ah box veilam sir atangin Digne chuan a cross, far post-a changtu nei lo Bailey chuan a chhuih goal. He goal a luh atanga minute thum lekah Villa chuan an goal hnihna an khung chhunzawm.
Arsenal-in corner an pet, Villa lamin an clear a, Arsenal lamin ball chang leh mah se, ball an hloh. Tielemans chuan na takin ball a vawrh, Watkins chuan chak takin a um a, box chhung a thlenpui hnuin David Raya a chip khum.
He match-a Arsenal chance tha ber chu first half-ah Trossard-a shot kha a ni a, hnai set sawt atangin a pet, Villa goalkeeper Martinez chuan a kein a lo dang hlauh.
Watkins kan fak lo thei lo, tun season Premier League-ah goal 19 a khung tling ta. Heng a goal khung zingah hian penalty goal a la tel lo zui. Top scorer ni mek Haaland chu goal khat chiahin a phak lo a ni.
Inrinni zanah Newcastle United-in 4-0 laiin Tottenham an sawp, Villa erawhin Arsenal an hneh. Khelh 33 atangin Villa chuan point 63 an hlawhchhuak a, anni aia game khata khel tlem Spurs chuan point 60 an nei. Unai Emery leh a hote top 4-ah an insawhnghet chho mek zel a ni.
Champion tum top 3 te chuan khelh 6 chiah an nei tawh, Arsenal leh Liverpool tan chuan Man City chetsual hun chan a ni tawh mai.
City hian Brighton, Forest, Wolves, Fulham, Spurs leh West Ham an la hmachhawn dawn.
Arsenal-in Wolves, Chelsea, Spurs, Bournemouth, Manchester United leh Everton te an la hmachhawn dawn.
Liverpool-in Fulham, Everton, West Ham, Spurs, Aston Villa leh Wolves an la hmachhawn dawn.
Eng nge thleng dawn tih chu sawi lawk theih ni lo mah se, an fixtures en hi chuan Manchester City khelh hmabak te hi an ziaawm deuh dawn niin a lang.