"Mi bawrhsawmte chuan daktor an ngai a," tih hla ang deuh khan, tun season zet chu United tlarhnung te hian daktor an pan zing malh malh hle mai.

Manchester United central defender Raphael Varane chu tihrawl hliam avangin kar hnih thum emaw vel a chawlh a ngai dawn a, Jonny Evans pawh tun inrinni match-a Bournemouth an hmachhawn hunah a inlan thei dawn lo.

Defender pahnih te hi Chelsea an hneh loh tuma inhliam ve ve kha an ni a, Varane a inhliam avangin Jonny Evans chuan a thlak a, Northern Ireland international pawh hi a luh hnu minute 20 velah tihrawl hliam avangin lak chhuah a ni leh nghal a nih kha.

Manchester United chuan an defender pahnih te inhliam thu an tarlang a, Varane hi May thla emaw vela a lo kir leh hman an beisei a, Evans erawh FA Cup semi final-a Coventry an hmachhawn hunah a inlan thei maithei.

United tlarhnung te hian dam kim lai an nei lo, Victor Lindelof leh Lisandro Martinez te thla khat tal an chawlh a ngai mek a, Luke Shaw leh Tyrell Malacia te pawh an chawl rei tawh hle bawk.

Erik ten Hag chuan Stamford Bridge-ah khan Harry Maguire leh Willy Kambwala te a inkawptir a, Liverpool nen 2-2 a an inhnehtawk tum pawhin anni pahnih hi an inkawp leh a, a bikin player naupang Willy Kambwala a rawn khel tha hle.

Tun season chu Malacia a inlan lo tluk a ni a, a chawl char char. Shaw pawh a rawn lang ve leh zeuh thin. Wan-Bissaka leh Martinez te pawh an inhliam rei a, Maguire pawh a inhliam leh bawk thin a, United tlarhnung te hian dam kim lai an nei lo a ni.