UCL: Rodrygo zarah Real Madrid-in Inter an hneh

16th September 2021, 12:09PM

Nizan zanlai khan UEFA Champions League Group D inkhelah Real Madrid chuan San Siro-ah Serie A champion lai Inter Milan an tlawh a, si khat faiin mikhual lam Real Madrid an chak.

Real Madrid hi Brazilian winger Rodrygo goal khat hmangin an chak hram a, goal hi hun tawp dawn a lut a ni a, Real hian point 3 an hlawhchhuak phah.

Mual neitu lam Inter hi first half-ah an khel tha a, Edin Dzeko leh Lautaro Martinez-te chuan Real hi an chhaih buai nasa angreng viau a, mahse a pawimawh ber goal erawh an khung thei lo.

First half-ah Inter hian inkhel thunun mahse counter-attack ah Real an hlauhawm thin hle a, Eder Militao chuan Real tan goal khungna hun tha tak nei mahse goal zawnah ball a tauh thei lo.

Second half-ah erawh Real an khel tha zawk a, inkhel pawh an thunun ve thung. Inter lamin chance nei tho mahse Real goalkeeper Thibaut Courtois thatzia kan hmu thin.

Real hian second half-ah inkhel thunun mahse Inter goalkeeper Samir Handanovic an tibuai khat a, mahse hun tawp dawnah erawh goal an rawn khung. 90mins-ah Eduardo Camavinga pass tha tak chu kum 20 mi Rodrygo chuan lo la in, goal-ah ball a pet lut zui a, hei hi Real chuan an chakpui ta a ni.

Group D inkhel dangah Maldovan club Sheriff chuan Ukranian club Shakhtar Donetsk an lo mikhual ve bawk a, rin loh zawk Sherrif hi si hnih faia chakin, Sheriff hi Maldovan club Champions League-a inlan thei hmasa ber niin, an Champions League game hmasa berah hnehna an chang nghal bawk a ni.

Copyright © inkhel.com 2024. All rights reserved.