Nizan zanlai khan nipui laia player lalut nasa tak Paris Saint-Germain chuan tun season atana an UEFA Champions League game hmasa ber khelin Belgian club Club Brugge an tlawh a, 1-1 in team hnihte hi an inhnehtawk.

Group A inkhela hian PSG chuan Ander Herrera goal hmangin hma hruai hmasa mahse, Hans Vanaken chuan Brugge lam si phurh sutin, point 1 ve ve an hlawhchhuak ta a ni.

He inkhelah hian PSG tlarhmaah a vawi khat nan Lionel Messi, Neymar leh Mbappe-te chuan inkhel bul an tan vek a, tlarhma nei turu viau mahse PSG hian point 3 an hlawhchhuak zo lo.

Mbappe chuan veilamah ball khalhin, Clinton Mata a bum hnuah Herrera ball a pe a, Manchester United midfielder hlui Herrera hian goal-ah ball pet lutin, inkhelh tan atanga 15mins-naah PSG in hma an hruai.

Darkar chanve khelh tlin a nih hma deuhin Brugge captain Vanaken chuan an si phurh a sut a, veilamah nalh takin Noa Lang leh Eduard Sobol te ball an inpek hnuah Belgian attacking midfielder Vanaken goal a khung.

Brugge hi he inkhelah hian an chungnung zawk mah emaw tih tur a ni a, Mbappe, Messi leh Neymar te an hlauhawm tawk lova, second half tir lamah Mbappe hi a inhliam avangin lakchhuah a ni nghe nghe a ni.

Group A inkhel dangah Manchester City chuan Etihad Stadium-ah German club RB Leipzig an lo mikhual a, Premier League champion lai City hian an mikhual hi 6-3 in an lo hneh a ni.