UCL: Knockout stage thleng lo tur Liverpool

14th September 2021, 08:09PM

Premier League club zingah Liverpool chu tun season UEFA Champions League group stage pal tlang thei lo tura ngaih an ni a, Manchester United pawh champion tura rin kai zingah an tel lo.

Data companny Gracenote chuan Euro Club Index kal tlangin hrilh lawkna hi an buatsaih a, hetah hian Bundesliga club Bayern Munich chu champion tura rin kai berah an dah a. Manchester City chu rin kai ber dawttu niin, Real Madrid leh Barcelona te chu a dawttu an ni bawk a. Lionel Messi luhna Paris Saint-Germain chu inla nasa viau mah se champion tura rin kai zingah hian 7-naah an dah chauh a ni.

Liverpool chu Group B ah an awm a, an group-ah hian Atletico Madrid, FC Porto leh AC Milan te an awm ve bawk a, hei vang hian an group chu ‘Group of Death’ tih an nih phah a. Heng team 4 te hi Europe khawmualpuia football club ranking-ah pawh Top 21 ah an lang thei vek hlawm a, hei vang hian group stage pal tlang theih pawh thil awlsam a ni dawn hauh lo a ni.

Jurgen Klopp leh a pawlte chu Gracenote hian champion thei tura rin kai dan indawt an dahah 7% vel chauh an pe ve a. An group atanga knockout stage kai thei tura rin kai lamah pawh Liverpool chu 11% chauh an pe bawk a, an tlak hma an ring hle tihna a ni ber.

Champion lai Chelsea chu an title humhim thei turah an dah lo a, champion tura rin kai dan indawtah pawh 5-naah an dah a, champion thei tur pawhin 8% vel chauhin an lakah rinna an dah ngam a. 7% an pek Liverpool chu an hnuai chiahah hian awmin, Paris Saint-Germain leh Atletico Madrid te chu 6% ve ve an pe bawk a ni.

Cristiano Ronaldo an lak luh leh tak avanga phur chho tak Manchester United pawh champion tura rin kai indawt danah hian an dah sang vak lo hle a, 9-naah an dah chauh a, an champion theihna tur pawh 4% vel chauh an pe a. Top 10 huangah hian Sevilla leh Borussia Dortmund te chu an lang phak ve chiah bawk a ni.

Group stage pal tlang tura rin kai chungchangah hian title kawltu Chelsea chu 81% atanga 92% velah an kaisantir a. An group-ah hian champion beiseiawm vak lo tura an ngaih Juventus, FC Zenit St. Petersburg leh Malmo FF te nen an awm a, hei vang hian knockout stage chu thleng thei ngei tura ngaih an ni.

Knockout stage kai thei tur hian Manchester United pawh an dah ve tho a, Ole Gunnar Solskjaer leh a pawlte chu Villarreal, Atalanta leh Young Boys te nen an awmho a. Manchester City pawh Paris Saint-Germain, RB Leipzig leh Club Brugge te nen an awmho a, an group atang chuan knockout stage lama inhlang chho thei tura ngaih an ni.

Group stage atanga knockout stage lama team 16 lut chho thei tura rin kai zingah hian Ajax, Atalanta leh Wolfsburg te chu team tha vak lo deuh tura ngaih an ni a. Shakhtar Donetsk, Zenit St. Petersburg, Benfica, RB Leipzig, Sporting Lisbon, FC Porto, Villarreal leh RB Salzburg te chu an group theuha pathumna ni tura rin kai niin, anni ho hi Europa League knockout round lama inlan tura ngaih an ni.

Copyright © inkhel.com 2021. All rights reserved.