UCL: Allegri hnuaiah Juventus an chak ve ta

15th September 2021, 10:09AM

UEFA Champions League inkhelah nizan zanlai khan Juventus chuan Swedish club Malmo FF an tlawh a, 3-0 in Juventus hi an chak a, July thlaa Massimiliano Allegri a kir hnua Juventus-in hnehna an chan vawi khatna a ni.

Group H inkhelah hian Juventus tan Alex Sandro, Paulo Dybala leh Alvaro Morata te chuan goal khat theih an khung a, Juventus hi point 3 hlawhchhuahpuiin, khelh khat khelh a nih hnuah Juventus hi Group H hmahruaitu an ni.

Swedish champions Malmo lam hian bul an tan tha zawk tih theih a ni a, mahse 20mins chuang hret khelh a nihin Juan Cuadrado-a ball cross chu Bentancur-a’n lo khawihin, far post lamah Sandro chuan mawi takin goal-ah a lo tauh lut a, Juventus-in hma an hruai.

Sandro hian goal a khung hnu lawkah chance tha tak a nei zui leh a, Leonardo Bonucci chuan Sandro tan hian veilamah tha zetin ball a vawrh a, Sandro hian lo chest thla in goal-ah a shoot a, mahse goal zawnah a pet thei lo.

40mins an khel chho a, Malmo defender Nielson chuan an box-ah Morata a titlu a, Juventus-in penalty an hlawhchhuak. Dybala chuan penalty spot atang hian goal khungin, 2-0 in Juventus hma a hruaipui.

Half time hmain goal dang a luh belh leh a, goalkick atanga ball vawrh chu Rabiot chuan lo dawngin, Morata a pe zui a, Morata hian a ngalin goal-ah ball a dah lut a, 3-0 niin, goal thum lut te hi first half-ah lut vek an ni.

Malmo 0-3 Juventus

(Sandro 23’, Dybala 45’pen, Morata 45+1’)

Player Ratings

Juventus: Szczesny (6), Danilo (6), De Ligt (6), Bonucci (7), Sandro (7), Cuadrado (7), Locatelli (7), Bentancur (7), Rabiot (6), Dybala (7), Morata (7) Subs: McKennie (5), Kean (6), Ramsey (5), Kulusevski (N/A), Rugani (N/A)
 
Malmo: Diawara (8), Berget (5), Ahmedhodzic (6), Nielsen (6), Brorsson (6), Rieks (6), Rakip (5), Innocent (5), Christiansen (5), Birmancevic (5), Colak (5) Subs: Nalic (5), Abubakari (6), Nanasi (N/A), Olsson (N/A)
Copyright © inkhel.com 2021. All rights reserved.