Boxing huanga hming langsar berte zinga mi Tyson Fury chu Deontay Wilder nen an inhnek dawn hnai tawh hle a, nimin lamah khan an pahnih hian hmai chhanah an intawng a, thawm pawh an nei lian nghal hle a. Staredown an nei a, mit la sawn hmasa zawk nih an duh lo ve ve a, an inmelh rei phah hle.
Tyson Fury hi British professional boxer a ni a, vawi hnih chu world heavyweight champion a ni tawh a, WBC title leh The Ring magazine title te chu 2020 a Deontay Wilder a hneh khan a kawl a. A hmain WBA, IBF, WBO, IBO leh The Ring title te chu a lo kawl tawh a, 2015 ah khan Wladimir Klitschko hnehin heng title hi a kawl a ni.
August 1988 ah khan Manchester khaw chuanhnuai lam Wythenshawe-ah a piang a, khawvel eng a hmuh hun tura ngaih aiin thla thum ngawtin a hmu hma a. Doctor te chuan Tyson Fury chu thla kim loa piang a nih avangin a dam chhuah loh mai an hlauthawng hle a, an hlauhthawn ang chu a thleng ta em lo a, tun dinhmunah hian a ding thei ta hial a ni.
Irish thisen kai Tyson Luke Fury hian kum 11 a nihin sikul kal a chawlhsan a, a pa leh a unau mipa pathumte chu kawng siamnaah a pui ve thin a. A nu Amber chuan vawi 14 lai nau a pai a, pali chauh dam chhuak hi an awm a, December 1997 ah khan fanu Ramona a hring a, ni rei vak lo chhung chauh a dam a, hei hi hetih laia kum 9 mi Tyson Fury chuan a theihnghilh thei lo a ni.
Kum 10 a nihin Fury chuan boxing a zir tan a, a pa Peter Fury chuan inhnek hi a zirtir thin a, 2011 thleng khan an inkaihruai a, a hnuah erawh mi pakhat kut a thlak avangin a pa hi tan in lamah a tang ta daih a. Hetiang a nih avang hian Fury patea Hughie Fury chuan Tyson hi a kaihruai chho ta a ni.
Amateur boxing huanga a luh tirh hian Fury chu England aiawh leh Ireland aiawh te pawhin a inhnek thin a. International level-ah Ireland aiawhin vawi thum chu a tel hman a, December 6, 2008 ah khan kum 20 mi niin professional boxing a khel tan a. Nottingham khuaah Hungarian boxer Bela Gyongyosi nen an inhnek a, hetah hian Fury chu first round ah TKO in a chak nghal nghe nghe a ni.
Thla sarih chhungin Tyson Fury hian mi paruk a inhnekpui hman a, a hmaa ding mi paruk Marcel Zeller, Daniil Peratyakto, Lee Swaby, Matthew Ellis, Scott Belshaw leh Aleksandrs Selezens te chu round 4 chhungin a knockout hman vek a ni.
September 11, 2009 ah Fury chu John McDermott nen an inhnek a, English heavyweight title an inchuh a. Hetah hian Fury chu point decision hmangin a chak a. Chuti taka a chet that vak loh avangin mi tam tak chuan thutlukna hi an sawisel nasa hle a, board pawhin rematch nei turin an ti hial a ni.
Fury hian mi pahnih dang a hneh zui leh a, Tomas Mrazek leh Hans-Joerg Blasko te a hneh hnuah McDermott nen June 25, 2010 ah khan rematch an nei leh ta nge nge a. An inhnek hmasak tuma sawisel kai deuh boruak ang kha a awm tawh lo chiang hle a, Fury chuan McDermott chu vawi thum ngawt a hnek tlu hman a, round 9 naah TKO in a chak a ni.
Hlawhtling takin boxing ring chhungah hun a hmang chho zel a, tuna a hmabak chu Deontay Wilder hmachhawn a ni a, anni hi July 24 ah khian an inhnek leh dawn a ni.