Tun kar tawp atanga tan tura ruahman Tokyo Olympic 2020 ah infiamna peng hrang hranga intihsiakna tur zingah football pawh a tel a. Khawvel ram hrang hrang atangin football hmanga inel turte pawh Japan ramah hian an kal khawm hlawm a ni.
Tokyo Olympic football bika tel tur team hrang hrang zingah Spain chuan player an nei hlu ber a, an team hlutna chu Germany team hlutna aiin a let 4 vel ngawtin a sang zawk a. Spain Olympic football team hluta chu £487 million zet niin transfermarkt.co.uk chuan an tar lang.
Football bika tel tura ram hrang hrang atanga kal khawm zinga player man to zual 15 thlan chhuaha 9 te chu Spain ram aiawha feh chhuakte an ni a. Heng zinga man to zual pahnih hi Spanish footballer te niin, Barcelona central midfielder Pedri chu tun tum Olympics-a footballer man to ber niin £72 million man zet a ni a. Real Sociedad winger Mikel Oyarzabal chu man to ber dawttu a ni a, a man chu £63 million a ni.
Top 10 huangah hian Spanish player dang pawh an lang hlawm a, £45 million man ve ve Dani Olmo leh Pau Torres te bakah £36 million man ve ve Carlos Soler leh Mikel Merino te chu an lang pha a ni.
Team hlutna san lamah hian Brazil chu pahnihnaah an awm a, an squad hlutna belh khawm chu £315 million niin, an player zinga man to ber chu £49.5 million man Richarlison a ni.
Germany chu pathumnaah an awm a, an squad hlutna belh khawm chu £111 million niin, an hnuai chiahah hian palina dinhmun hauhtu Argentina an awm a, an team hlutna hi £110 million a ni a, an player neih man to zual te chu £17 million man Maximilian Arnold leh £18 million man Thiago Almada te an ni.
France squad hlutna belh khawm chu £105 million niin pangana an ni a, paruknaah squad hlutna belh khawm £103 million ni pha Ivory Coast an awm bawk a. Ivory Coast player man to ber chu £49.5 million man AC Milan midfielder Franck Kessie a ni.
Mexico chu pasarihna an ni a, an squad hlutna belh khawm chu £81 million niin, an hnuai chiahah hian squad hlutna belh khawm £67 million tling pha Japan an awm a. South Korea squad hlutna belh khawm chu £25 million niin pakuana an ni a, Egypt squad hlutna belh khawm chu £16 million niin Top 10 ah hian an lang pha chiah bawk a ni.