Anthony Martial chuan tun season tawp ruala Manchester United a chhuahsan dawn nia a lan avangin, Erik ten Hag chuan Martial thlakna tur a duh thu a sawi chhuak.

Martial-a contract-ah hian kum khat dang atana pawh sei theihna awm mah se, hei hi United chuan chhunzawm an tum tawh lo nia report a ni a, heti a nih chuan French striker hian tun season tawp rualin United a chhuahsan dawn tihna a ni.

United hian Rasmus Hojlund an nei a, ani thawhpui tur hi Erik ten Hag chuan a mamawh, "Striker thar kan neih belh chuan min pui khawp ang le," tiin Erik ten Hag chuan a sawi.

United-ah Martial hi kum 9 a lo awm tling ve ta a, mahse inhliam avangin kum 28 mi hian inkhelna hmun a chang tam lo. 

2019-20 season kha Martial-a khelh that ber season niin, competition hrang hrangah goal 10 aia tam a khung. French striker hian United tan game 48 atangin goal 23 a khung ve tawh a ni.

Tun season-ah pawh December ni 9 atang khan inhliam avangin Martial hi a inlan leh tawh lo. Zai a tawh avangin kar 10 emaw vel tal a chawlh a ngai a, tunah training ground rap leh tawh mah se, chhawr theih a nih hun tur a la sawi theih loh.

"Martial-a chanchin hi kan ngaichang reng, striker pahnih hi kan mamawh em em reng a ni.

"Season hmasa kha kan khel tha pangngai fu mai, striker chhawr reng theih pahnih hi nei ilang chuan, hei hian kan mamawh nasa takin min phuhru thei ang," tiin Erik ten Hag chuan a sawi bawk.

Nipui bazar liamta khan United chuan Atalanta atangin €75million (£64m; $79.8m) bakah add-ons in Rasmus Hojlund an lei, Dannish forward hian United tan game 34 atangin goal 13 a khung ve tawh.

Hojlund leh Martial chhawr theih an nih loh changin Ten Hag chuan Marcus Rashford chu centre forward atan a hmang thin a, a hnung chiahah Bruno Fernandes chu false 9 angin a chhawr thin bawk.

"Tun nipui bazar inhawng tura striker thar kan neih belh chuan, min pui khawp ang le. Striker kan neih belh chuan goal khung lamah pawh kan duhthusam a thlen bawk ang.

"Season hmasa khan Rashy khan goal 30 a khung tling a nih kha. Ka season hmasa berah khan Martial pawh a khel tha em em a, kan game-ah tha a thawh hlawk em em a ni.

"Goal khung thei Rasmus Hojlund ang hi kan lak belh a nih chuan, goal pawh kan khung thei bawk ang," tiin Erik ten Hag chuan a sawi.

United hi Premier League-ah 6-na an ni mek a, goal khung lamah erawh 11-na an ni tlat mai. Game 31 atangin goal 45 chiah an khung a, table-a 13-na Fulham ai pawhin goal an khung tlem zawk a, table-a 15-na leh 18-na Brentford leh Luton nen an goal khung zat a inang.