Tottenham chuan manager thar an la zawng zela, tun season zawh ruala AS Roma chhuahsan tu kum 48 mi Paulo Fonseca chu an lalut dawn niin a lang.

Tottenham hian sporting director thar an nei dawna, Juventus-a transfer lama lo thu em em thin Fabio Paratici chu an la fel titih tawha, Paratici hi official-in la lalut lo mahse, Paratici hi Spurs-in Fonseca lak an tum chungchangah a inrawlh thuk hle nia sawi a ni.

Sky Italia tarlan danin, Portuguese manager Fonseca hi Spurs chuan kum thum daih contact ziahpui an duha, mahse Fonseca leh Spurs inkarah hian tun dinhmunah chuan inremna a la awm chiah lo nia sawi a ni.

Tottenham hian season liamta tawp lam khan Carabao Cup final an khelh hma lawkin an manager Jose Mourinho an bana, Mourinho hi Roma hian season zawh rualin an ruai ve leh nghala, Spurs-in Fonseca an la ve leh a nih chuan, Spurs leh Roma-te hian manager an inthleng a ni deuh ber dawn.

Tottenham hian manager thar an la nei hleithei lova, an manager hlui Mauricio Pochettino lak let leh an tumna a tlawlh hnuah Antonio Conte lak tum leh viau mahse an hlawhchham leha, Fonseca erawh an lak ngei a rinawm tawh a ni.