South American footballer man to 5

21st July 2021, 06:07PM

Kum 10 kal ta atang khan khawvelah footballer man a to sawt hle a, a bik takin Europe khawmualpuia football club tam tak chuan player leina atan pawisa an hmang nasa hle.

Player lei kual zingah hian South American footballer te chu tlema man to zual zingah an lang nual hlawm a. League hrang hrangah South American player te hi an inzar pharh nasa tawh hle a, tun tumah hian man to zual thlan chhuah 5 te han tar lang ila.

5. Luis Suarez
Liverpool a zawm atangin Premier League lamah thawm a nei tha chho hle a, Anfield-a No. 7 jersey ha tawh zingah chuan a tha ber pawl a ni nghe nghe a. 2013-14 season-ah khan a che tha em em mai a, Liverpool chu league title a lakpui teuh hle a, Manchester City an tluk thei ta lo hlauh a ni.

He mi season-ah hian Luis Suarez chuan goal 31 lai mai a thun a, mi goal thun tur vawi 17 a siamsak bawk a. 2014 nipui transfer window inhawn khan Barcelona chuan €81.72 million zetin an lei a, Lionel Messi leh Neymar te nen an inkawp a, Europe khawmualpuiah chuan tlar hma lama inkawp fuh ber pawl an ni a, 2015 ah khan Barcelona chu trophy pathum an lakpui thei a ni.

4. Neymar
Brazilian forward Neymar chu an ram club Santos tan a che tha thei bawk a, Barcelona chuan 2013 kumah khan €88.20 million zet sengin an la lut a. Camp Nou lama a insawn hnuah hian a man a to bawk a, a lakah beiseina sang tak an nei hlawm a, mi beisei san ang chiah chuan khelmualah pawh a che tha zui thei a ni.

Neymar chuan season 5 chhungin Barcelona tana game 186 khelhah goal 105 lai mai a thun thei a, Catalan club lian tan hian trophy lak theih ang chu a la kim hman vek bawk a ni.

3. Gonzalo Higuain
Argentine striker Gonzalo Higuain chu Napoli tan a che tha thei hle a, he club tana game 146 khelhah goal 91 lai mai a thun thei a. Hetiang taka a chet fuh thin avang hian Juventus chuan lak ngei an duh phah a, 2016 ah khan an club record thar siam khawpin €90 million zetin an lei a ni.

Gonzalo Higuain hian Juventus chu 2016-17 season-ah khan Serie A title a lakpui a, game 38 khelhah goal 24 a thun thei a ni.

2. Philippe Coutinho
Brendan Rodgers kaihhruaina hnuaiah Philippe Coutinho chu Anfield-ah a che tha thei hle a, Brazilian footballer zingah chuan Premier League huanga che tha ber pawl tiin a sawi theih hial a. Liverpool enkawl tura Jurgen Klopp an rawih hnuah pawh khan a che tha chho zel tho a, trophy erawh a la thei lo thung.

A ke a rang a, hla deuh hlek atang pawhin goal a thun thei em em mai a, hei vang hian Philippe Coutinho hming chu mi sawi rik nasat em em mai a ni chho a. Hetiang taka a lar chhoh takah chuan Barcelona in an ngaihven a, 2018 thlasik transfer window inhawn lai khan €135 million zetin an lei a ni.

1. Neymar
Paris Saint-Germain chuan sum an nei bawk a, 2017 kumah khan Barcelona atangin Brazilian forward Neymar chu €222 million zetin an lei a, khawvela footballer man to ber a nih phah a. PSG hian league title tih vel chu an la fo a, an beisei em em UEFA Champions League trophy erawh an la thei rih lo thung a. Hei bakah hian Neymar chuan Ballon d’Or a la dawng ve thei rih lo a, Lionel Messi leh Cristiano Ronaldo te hnungah a la awm zel a ni.

Copyright © inkhel.com 2021. All rights reserved.