Manchester United midfielder Casemiro chuan season an hman chhiat avangin mut mu a tuah tha thei lo.

Kum 32 mi hian 2022 Thitin thla khan Real Madrid a kalsan a, £70m-in Old Trafford a zawm. Spain-a a awm lai angin England-ah a hlawhtling lova, a thil tawn a inthlak thawk a ni ber.

Premier League season kal mekah point 22 laiin hmahruaitu Arsenal an pha lova, season tharah European football an khel dawn em tih pawh a chiang lo. Kar tam vak lo liamta atang khan an buai zual a, Brentford, Liverpool leh Chelsea an hmachhawn tumin hun pekbelhah goal an chhuah.

Casemiro chuan, "A hautak khawp mai. Champion beisei ngam lo khawpa kan awm avangin na ka ti a, hei hian ka rilru a luah ber. Pakhatna nena kan inkarah point 20 zet a awm a, thil tha zawk ngaihtuah vanga mut theihloh chang ka ngah. Nomawi emaw Champions League emaw ngaihtuah a hun lova, kan hmabakah chiah rilru pek kan mamawh.

"Nitina kan hun hman pawh a pawimawh a, insiamthatna tur a tam khawp mai. Tunhnaia game kan neihah point kua hmuh belh thei kan ni a, mahse kan hloh a tam zawk tlat. Game tinah rilru pek a ngai a inthlahdah thei kan nilo." tiin ESPN Brazil hnenah a sawi.

Brazilian midfielder hian United a zawm tirhin fak a hlawh a, amaherawchu a tlahniam chak hle. Liverpool nena an inhnehtawk hnuah an sawisel luai luai a, ball a hloh tam bakah a che tlai thei em em bawk. Nipuiah a chhuak dawn tih thawm a awm a, Middle East-a pem tur angin chanchin a nei deuh reng a ni.