Chelsea a kaihhruai laia beisei pha lo, Graham Potter chuan hmun hrang atangin sawmtu a nei a, a thutlukna an ngaichang thup mai.

Kum 48 mi hian 2023 Tau thlaa Chelsea a chhuahsan hnuah enkawl ala nei leh lova, thutawp a siam thuai dawn niin an sawi. Nikum Khuangchawi thla atanga manager nghet la nei lo Ajax-in an hel a, inbiakna pawh an nei tawh niin a lang.

Ajax hian Maurice Steijn an ban hnuah John van't Schip an chhawr a, khelmual chhung leh pawnah buaina lian tak an nei. Kartawp liamta khan Feyenoord-in an sawp a, an hotute inkarah pawh in hmuh thiamlohna lian tak a awm.

Tun thla tir khan an chief executive ni lai Alex Kroes an suspend a, bultan nan manager nghet neih phawt an duh. An beisei ber nia lang, Potter hian a tana tha ber tur a ngaihtuah a, hmalam hun thlir chungin thutawp siam a duh.

Manchester United-in Erik ten Hag an ban anih chuan Old Trafford a pan dawn tih thawmte pawh a awm a, United sporting director thar ni tur Dan Ashworth nena an thawhdun tawh thin avangin an sawizawm nasa hle.

Chelsea-a a awm chhungin sulhnu ropui a nei lova, Champions League quarter-final an lut tih loh chu inchhuanna tur a nei lo. The Blues hian thla sarih an hrawn hnuah an ban a, Swedish club Ostersund, Brighton leh Swansea City-te pawh a enkawl tawh thin a ni.