"Player-in inkhelh a duh miau loh chuan, a khel lo mai ang," tiin Pep Guardiola chuan pre-match press conference-ah a sawi chhuak.

Rodri hi a chau ve deuh niin a lang a, chawlh hahdam a duh niin a lang a, Pep Guardiola chuan a midfielder hi tun weekend match-ah chawlh pek a tum thu a sawi.

Kum 27 mi Rodri hian tun season-ah Man City tan game 41 a khel tawh, thawhlehni zan khan Real Madrid nen 3-3 in an inhnehtawk a, tun weekend match chu chawlh hahdam ve a duh a ni awm e.

Manchester City hian tun inrinni zan hian table mawng lama awm Luton an hmachhawn dawn.

"Player-in inkhelh a duh loh chuan, a chawl mai ang, a awlsam lutuk," tiin Man City boss Pep Guardiola chuan a sawi.

Rodri hi Europe top 5 league-ah chuan ani aia inkhelh bul tan hnem mi 3 chiah an awm, ni 429 chhungin game 66 lai City tan a khel a, a khelh lohin City an talbuai thin.

Tun season domestic match lamah Rodri hi hrem a tawh avangin match 4 a khel lo a, hengah hian City an chak zo lo vek bawk.

"Kan game han en ula, Rodri pawimawh zia in hria ang, a thiamna hi kan tan a pawimawh thlawt a ni.

"Crystal Palace leh Real Madrid kan hmachhawn tum khan a chau tih a lang chiang. Mahse Madrid-ah khan second half-ah a khel tha phian.

"Thahrui lam aiin, a rilru paukhauhna kha a khelh thatpui a ni ka ti lo thei lo. Ni thum danah kan inkhel chho ta zawt zawt chu a ni a, a chau ve deuh a ni e," tiin Guardiola chuan Rodri chungchang a sawi.