PSG midfielder thar Wijnaldum

10th June 2021, 09:06PM

Paris Saint-Germain chuan vawiin khan Liverpool-a contract hmang zo tur Georginio Wijnaldum an lak fel thu an puanga, Dutch midfielder hi PSG chuan kum thum daih contract an ziahpui.

Wijnaldum hian Liverpool-a a contract chu tun thla zawh rual hian a hmang zo dawna, July thla ni 1 atangin PSG-a a contract a intan dawna, PSG hian man nei lovin Wijnaldum hi an lalut.

Kum 30 mi Wijnaldum hi Barcelona-ah a lut ngei dawna a lan laiin, PSG an rawn langa, PSG hian hlawh tam zawk nen thlemin Paris-ah an thlem lut thei ta a, kum 2024 June thla thleng daih contract an lo ziahpui.

Euro 2020-a Netherlands captain tur Wijnaldum chuan PSG a zawm chungchang sawiin, “Paris Saint-Germain ka zawm hi ka tan chuan chona thar a ni a, Europe-a team tha ber zinga pakhat ka zawma, ka theihna zawng zawng pe turin ka inpeih a ni.

“Paris Saint-Germain hian an theihna leh tumna tun hnaiah an tilang hle a, kan supporter te tan hmalam nasa taka kan pan ho theih ngei ka beisei tlat a ni,” a ti.

Wijnaldum hian kum 2016 July thla khan Liverpool a zawma, Liverpool tan hian vawi 237 khelin, Champions League leh Premier League nomawi pakhat ve ve season nga a awm chhungin a chawi a ni.

 

Copyright © inkhel.com 2021. All rights reserved.