PSG leh Real Madrid te'n Rudiger an ngaihven

15th September 2021, 09:09PM

Ligue 1 heavyweight Paris Saint-Germain leh La Liga heavyweight Real Madrid te chuan Chelsea-a contract nei rei tawh lo Antonio Rudiger chu an ngaihven hle tih chanchinbu mite chuan an tarlang.

German defender Rudiger hian Stamford Bridge-ah tun season daih bak contract a nei tawh lova, Chelsea hian an defender hi contract thar zawrh tan tawh mahse tun thlengin inremna an la nei thei lo.

Chelsea hian kumin chhungin Rudiger hi contract thar an ziahpui hman loh chuan, nakkum January thla atang hian PSG leh Real te’n Rudiger hi an be thei tawh dawn a, season zawha lalut turin pre-contract pawh an ziahpui thei tawh dawn.

Kum 28 mi Rudiger hian a duhdan te tih hlawhtlin a nih chuan Chelsea-ah hian contract ziah belh a hnial lo nia tarlan a ni a, mahse Chelsea hian Rudiger-a duhdan hi rem an ti ve dawn em tih erawh a sawi theih rih loh.

Chelsea hian Sevilla defender Jules Kounde chu nipui bazar lai khan an dawr a, lakluh tum viau mahse Sevilla nen inremna an nei thei ta lova, Rudiger-a dinhmun a chian loh em avangin Chelsea hian Kounde hi dawr leh ngei an tum niin chanchinbu mite chuan an tarlang a ni.

Copyright © inkhel.com 2024. All rights reserved.