Premier League match pawimawh tur 10

16th June 2021, 07:06PM

2021-22 Premier League fixture an tlangzarh ta a, champion lai Manchester City chuan an title kawl lai humhim ngei an tum dawn a. Pep Guardiola leh a pawlte hian Tottenham Hotspur an hmachhawn hmasa ber dawn a, chona an hmachhawn hautak nghal dawn hle.

Season lo awm turah hian title la thei tura rin kai eng emaw zat an awm leh dawn a, chutiang karah chuan title lak theihna kawnga awmze awm thui deuh tura ngaih match eng emaw zat a awm dawn a. Match pawimawh zual tur nia ngaih 10 kan tar lang ang.

Liverpool vs Manchester City : October 2
Season liam taah khan beisei angin an che fuh vak lo a, season lo awm turah hian Anfield-ah Jurgen Klopp leh a pawlte chuan champion lai Manchester City an lo mikhual dawn a, title la thei ngei turin theihtawp chhuah an tum dawn a. An mikhualte hi an lo hneh thei a nih ngat chuan league title lak an tumna kawngah kawngro a su hle dawn a ni.

Manchester United vs Manchester City : November 6
2021-22 season chhunga Manchester derby hmasa ber chu November 6 ah Old Trafford-ah an khel dawn a, Ole Gunnar Solskjaer leh a pawlte tan chuan pahnihna ni tawh loa pakhatna ni thei ngei tura zin kawng pawimawh tak a ni ang. Guardiola tan chuan title lak leh lak loh hriltu pawimawh ber a ni kher lo mai thei a, Manchester United tan erawh chak theih ngei a pawimawh hle ang.

Leicester City vs Liverpool : December 28
Liverpool chuan Boxing Day-ah Leeds United an hmachhawn ang a, darkar 48 hnuah Leicester City an hmachhawn zui leh dawn a. Leicester City chuan Premier League club chungnung pali zinga tel theih ngei an tum dawn a, Europa League lamah an inhmang tel bawk a, an buai ve fu dawn a. Team pahnihte hian title an melh dawn a nih chuan an tan chak theih ngei a pawimawh dawn a ni.

Chelsea vs Liverpool : January 1
Team pahnihte tan chak theih ngei a tul dawn a, 2022 kum bul hmang fuh zawk nih ngei an tum ngei ang. Chelsea leh Liverpool te hian Premier League title inchuhnaah Manchester City chu lehpelh ngei an tum dawn a, chutiang tur chuan theihtawp an chhuah a ngai ang.

Manchester City vs Chelsea : January 15
Thomas Tuchel leh a pawlte chuan Africa Cup of Nations vangin Edouard Mendy an chhawr thei dawn lo a, Kepa Arrizabalaga chuan nipui hunah Stamford Bridge a chhuahsan a rinawm bawk a. Mi thar an lak luh ngei a rinawm a, Willy Caballero pawh an chhuahtir hmel a, goal vengtu thar kutah an innghat lian hle dawn tihna a ni ang. Champion lai Manchester City khelmual Etihad Stadium-a inkhel tur an ni a, point 3 hlawh chhuah theih a pawimawh dawn a, chutiang tur chuan theihtawp an chhuah erawh a ngai dawn a ni.

Liverpool vs Leicester City : February 9
Liverpool chuan Anfield-ah Leicester City an mikhual ang a, match hautak tham ve tak a nih ngei a rinawm a. Africa Cup of Nations khelh lai a ni dawn a, hei vang hian Reds chuan Mohamed Salah leh Sadio Mane te bakah Naby Keita te chu an chhawr theih loh hmel a. An tan league point hmuh hnem a pawimawh viau dawn a, an tan ve hle a ngai ngei ang.

Manchester City vs Manchester United : March 5
Etihad Stadium-ah a vawi hnihna atan Manchester derby en tur a awm dawn a, UEFA Champions League lama an la dam zel a nih chuan round of 16 an khelh hma lawk a ni dawn a, player chawlh thentir chungchangah ngaihtuahna a buai pha ve mai thei.

Manchester City vs Liverpool : April 9
Tun hnaia champion thei pahnihte hi league game 6 chauh khelh tur a la awm tihin an inhmachhawn dawn a. UEFA Champions League quarter final khelh hmabakin an awm dawn a, squad pangngai an khelhtir dawn nge dawn lo sawi thiam a harsa hle ang.

Manchester United vs Chelsea : May 15
Title la thei tur a rin hriat theih tan tawh tura ngaih a ni a, chutiang karah chuan game lian tham tak a la ni ngei dawn a. Team pahnih te tan point 3 hlut dan a la danglam dawn chuang lo a, inkhel boruak sang tak chu a nih ngei a rinawm.

Manchester City vs Aston Villa : May 22
An title kawl lai humhim tumna kawngah Manchester City tan match tin a pawimawh em em vek dawn a, hei pawh hi kawngro su pha thei a ni ngei dawn a. Aston Villa tan lah a chungnung pali zinga tel theih tumna a lian dawn a, chu vangin point 3 hlawh chhuak zawk nih an tum dun hle dawn a ni.

Copyright © inkhel.com 2024. All rights reserved.