Premier League-in inlak hran tum an awm tawh loh nan dan thar an siam

04th May 2021, 01:05PM

Premier League chuan English FA nen an inbiakrawn hnuah English club-te league dang zawm an awm theih tawh loh nan dan tha zawk an siam thar.

Thla hmasa khan English club lian zual paruk Chelsea, Manchester City, Tottenham, Arsenal, Liverpool leh Manchester United te chuan European Super League an zawma, mahse nasa taka dodal a nih avangin Super League hi din a nih atanga darkar 48 chhung vel lekin a zuihral titih nghal.

Premier League dan thar siamah hian club neitu zawng zawng te chuan Premier League dan laimu an pawm ngei tih an sign hnan vek a ngai tawh dawna, nakin zelah Premier League leh FA remtihna lova league dang an zawm a rem tawh dawn lo.

Super League zawm club paruk te hi inhnukdawk leh vek tawh mahse, mi tam takin an thil tih avang hian hrem ngei a nih an phuta, point paihsak emaw, league hniam zawka paihthlak emaw European competition-a an tel phal sak loh emaw thleng sawi rik a ni.

Heng club paruk te hi hrem an ni dawn em a sawi theih rih lova, a chunga tarlan anga hrem an nih loh pawhin an chungah hremna eng emaw tak chu lekkhawh a nih ngei a rinawm a ni.

Copyright © inkhel.com 2021. All rights reserved.