Inrinni zan khan Manchester City chuan Etihad Stadium-ah Luton Town an mikhual a, mual neitu team hian 5-1 laiin an mikhual te hi an sawp.
Etihad Stadium-ah hian goal a lut hma kher mai, tan atanga second 65-na lekah Manchester City chuan an goal hmasa ber an khung.
Erling Haaland chuan a volley, Hashioka hmaiah perin, hei hi Luton goal-ah a lut a, si khat faiin Manchester City chuan hma an hruai.
First half chhungin Manchester City-in chance tam tak an nei, Luton goal bul hnaiah an inkhel a ni ber mai. Hetih lai hian goal dang erawh an khung thei mai lo.
Second half minute 64-ah Kovacic hmangin City chuan an goal hnihna an khung. City chuan short corner neiin, Alvarez chuan Kovacic-a tan a pe a, ani hian box chhung chiah atangin kawh mar pawtin a hlap goal.
City chuan goal dang khung tumin an nawr chhungzawm zel, Onyedinma chuan box chhungah Doku a titlu, referee chuan penalty a ham a, he penalty hi minute 76-ah Haaland chuan goal-ah a chantir.
Inkhelh thunun viau mah se, Man City an chesual ve tlat mai. Back line atanga game play chhuah an tum laiin, Barkley chuan a lo dang chat a, box chhungah ball a khalh luh hnuin bottom corner-ah mawi takin a chhuih goal.
3-1 a ni a, Man City chuan an nawr chhunzawm zel. Doku chuan mual veilam sir atangin box chhungah mawi lutukin ball a la lut, defender te a bum tlang hnuah mawi lutukin far post lamah a chhuih goal.
City hian an la duhtawk mai lo, 90+3 minute-ah Gvardiol chuan chuan box chhung chiah atangin kawh lutukin top corner-ah a chhuih goal ve leh a, 5-1 laiin Manchester City chuan hnehna an chang ta a ni.
Point 3 an hlawhchhuah avang hian Man City chu Premier League hmahruaitu an ni ve leh ta hlawl mai. Khelh 32 atangin point 73 an nei a, Anni aia khelh khata khel tlem Arsenal leh Liverpool te an zuan khum.
Liverpool leh Arsenal te hian point 71 ve ve an nei a, Pathianni zanah anni pahnih hian match an nei ve ve. Liverpool chuan Crystal Palace an hmachhawn ang a, Arsenal chuan Aston Villa an hmachhawn ang.
Arsenal leh Liverpool te hian an khingpui hi an hneh ve ve a nih chuan, Man City hi an zuan khum leh dawn tihna a ni.
Etihad Stadium-a chak lo zawk Luton Town erawh bottom 3-ah an insawh nghet chhunzawm zel a, khelh 33 atangin point 25 an nei a, 17-na Forest chu point khatin an phak lo.