AC Milan striker thar Olivier Giroud chuan Pathianin AC Milan tana khel tura a duh avangin AC Milan chu zawm a nih thu a sawi.

Thla hmasa khan Giroud hian Chelsea atangin AC Milan hi a zawma, AC Milan hian kum 34 mi manah hian euro maktaduai 2 sengin, kum 2023 June thla thleng daih contract an ziahpui.

Giroud chuan San Siro a pan chungchang sawiin, “Club ka khelh tawhna apiangah trophy tam tak ka chawi thina, he hmunah pawh hian chu chu chhunzawm ngei ka duh. Ka rilruah hian hmachhawp ka neia, mahse ka chunga pressure a awm loh nan sawi chhuah loh ka duh. Chuvang chuan ka tum ber chu Milan hi trophy chawipui a ni tih zawng chiah ka sawi ang.

“Chelsea chhuahsana league danga hun ka hman a hun ve tawha, Pathianin Milan tana khel tur hian min duh. He club hi khawvela club lian ber pakhat a ni a, tuna an hmachhawpah hian ka rinna ka nghat bawk. Champions League-a che tha turin kan tha tawk a ni,” a ti.

Sawi zelin AC Milan no.9 thar Giroud chuan, “Ka kum hi chuan awmzia a nei lova, Zlatan Ibrahimovic hi kei aiin a upa hreta, mahse kan rilru lam hi a ni ber zawk. Min chawk phur tu tur a awm chuan kan la bei zel thei a ni,” a ti.