Pablo Escobar kha drug hmanga sumdawng lian, khawvel pum huap pawh a hausa ber ber te zinga lang pha a ni.
Football a ngaina em em a, mirethei tak chhungkua atanga seilian niin, mirethei a hmangaih hle bawk.
Colombia-in football-a hma an sawn theih nan a sum hmangin hmun hrang hrangah khelmual a siam a, mirethei tan in tam tak a sa bawk.
Sum a ngah bawk a, Colombia-a inkhel turin khawvela footballer tha ber ber a chah lut a, Colombia-in football-a hma an sawn theihnan a sum tam tak a seng bawk.
A duhthusam ang ngeiin Colombia chuan Football-ah hma an sawn chak hle mai, Colombia ram chu football hmangin a chawi lar a, khawvela ram tha ber te zingah a hlangkai chho.
Andres Escobar ve thung erawh Colombia player hmabak eng tak, South America-a defender tha bera ngaih a ni a, 94 World Cup zawh ve leh, khatih hunlaia Europe-a club lian bera ngaih Milan lamin an club-a khel turin an sawm.
94 World Cup vel lai khan Colombia ramchhung a buai hle, rukruk, inthah, kidnapp leh sual chi tinreng a hluar hle a, mipui tam takin an lawm em em Pablo Escobar thah a ni zui bawk nen, Colombia ram chhung chu a ralti em em a ni.
Pepe-a meuh pawhin 94 World Cup-a champion tura a rin ber Colombia chuan World Cup bul an tan chhe hle a, an match hmasaberah an chak loh nghal avangin Colombia player pakhat unaupa chu thah a ni nghal phawt.
Colombia-te inkhelah hian drug hmanga sumdawng ten sum tam tham tak an inchawi thin a, mi kidnap leh thah thleng tih hreh neilo an nih avangin, Colombia player-te hian an nunna leh an chhungte nunna thapin an inkhel a, khawvel pum huap pawha player tha ber ber ni hlawm mahse field pawn lam chuan an rilru kai peng nasa hle.
Chak ngei ngei an mamawhna game-ah Andres Escobar chu a vanduai fal ta bik a, USA an hmachhawn tumin anmahni lamah goal a thun palh hlauh mai. World Cup atangin an tla ta a, an tlak hnu lawk hian an ramah ngei Andres Escobar hi thah a ni zui ve ta bawk a ni.
Mi tam tak chuan football hmangaih em em, amah thah tumtu ten an veh lai, nunna hlauhawma a din lai pawha radio hmangte a Colombia inkhel chanchin ngaithla zak zak thin, Pablo Escobar kha la dam se chuan Andres Escobar hi misual in an thah an ringlo hial a ni.