Olympics: Cristiano Ronaldo vs Lionel Messi

21st July 2021, 07:07PM

Khawvela footballer ropui ber pawl tia sawi pahnih, Cristiano Ronaldo leh Lionel Messi te chuan an vanglaiin sulhnu an nei tha dun em em mai a. Football khawvelah an thlen chinah chuan hlawhtlinna duhawm tak tak an nei chho deuh reng a ni.

An pahnih hian trophy lak theih ang chu an la kim deuh vek tawh ve ve a tih theih a, club huangah phei chuan trophy lak loh an nei tawh lo a tih theih hial a. Hetiang khawpa sulhnu nei tha pahnih hi Olympic Games lamah eng ang takin nge an lo inhman tawh tih kan thlir ang.

2004 Athens Olympics ah khan kum 19 mi Cristiano Ronaldo chu Portugal football team zingah a tel ve a. He mi kumah hian Portugal chu Iraq, Costa Rica leh Morocco te nen group khatah an awmho a, group stage-ah hian an che tha lem lo hle a, group match khelh zawhah point hmu hniam ber an ni a, an tla zui nghal a ni.

Portugal chu 2004 Athens Olympics football-ah hian vawi khat chiah an chak ve thei a, Morocco chu 2-1 in an hneh a, Cristiano Ronaldo chuan goal 1 a thun ve nghe nghe a, a dang erawh match dangah pawh a thun belh tawh lem lo a ni.

He mi tuma Cristiano Ronaldo khelhpuite chu Jose Moreira (Goalkeeper), Bruno Vale (Goalkeeper), Mario Sergio (Defender), Bruno Alves (Defender), Ricardo Costa (Defender), Fernando Meira (Defender), Nuno Frechaut (Defender), Jose Bosingwa (Defender), Joao Paulo (Defender), Raul Meireles (Midfielder), Hugo Viana (Midfielder), Carlos Martins (Midfielder), Jorge Ribeiro (Midfielder), Luis Boa Morte (Midfielder), Hugo Almeida (Forward), Luis Lourenco (Forward) leh Danny (Forward) te an ni.

Lionel Messi chu 2008 Beijing Olympics ah khan Argentina football team-ah a tel a, khawvela infiamna kutpui ropui berah hian Cristiano Ronaldo ai chuan a che fuh deuh zawk a, gold medal a dawng thei a ni.

Argentina football team chu captain Juan Roman Riquelme kaihhruaina hnuaiah 2008 Beijing Olympic Games-ah hian an che tha em em mai a, a tir atanga a tawp thlengin hneh loh an nei miah lo a, match 6 an khelhah an chak kim vek a, an champion a ni.

He mi tumah hian Lionel Messi chuan goal 2 a thun a, group stage-ah Ivory Coast lakah goal khat a thun phawt a, quarter final-a Netherlands nen an inkhelhin goal khat a thun belh leh bawk a ni.

Lionel Messi khelhpuite chu Sergio Romero (Goalkeeper), Oscar Ustari (Goalkeeper), Nicolas Navarro (Goalkeeper), Ezequiel Garay (Defender), Fabian Monzon (Defender), Pablo Zabaleta (Defender), Federico Fazio (Defender), Nicolas Pareja (Defender), Fernando Gago (Midfielder), Jose Sosa (Midfielder), Ever Banega (Midfielder), Juan Roman Riquelme (Midfielder), Angel Di Maria (Midfielder), Javier Mascherano (Midfielder), Ezequiel Lavezzi (Forward), Lautaro Acosta (Forward), Diego Buonanotte (Forward) leh Sergio Aguero (Forward) te an ni.

Copyright © inkhel.com 2021. All rights reserved.