NT Biakkima'n title humhim

28th November 2021, 01:11AM

November ni 27, 2021 (Inrinni) zan khan Dawrpui Multipurpose Hall-ah LPS Fight Night 2 neih a ni a, bout 7 awmin Mizo professional boxer 6-te chuan an khingpui an hneh vek a, main event IBA Intercontinental Title Fight-ah NT Biakkima chuan a khingpui Gerttipong Kumsahwat chu Technical Knock Out hmanga hnehin a title a humhim.

Dawrpui Multipurpose Hall-ah hian covid 19 hrileng avangin a hmunah entu mipui an awm tam thei lo a, sawmbik te chiahin a hmunah fight an en a, LPS chuan PPV hmangin fight hi an broadcast bakah Chhimbal app atangin mipuiin fight an en bawk. Main event fight hi a rei lo a, Biakkima hian a khingpui a hneh em a, Round 2 lek chhungin a hneh hman.

A tir atangin Biakkima'n a nawr nghal bian bian, a nakah a hnek hnem bawk. Gerttipong Kumsahwat pawhin a chhang let zauh zauh. Round khatna tawp nana minute khat tling lo a awmin Biakkima chuan a kuttum veilam chuan Gerttipong Kumsahwat-a khabe dawhah a hnek siah, Gerttipong Kumsahwat a tlu zuai, Round 1 a tawp chuan Biakkima a chhungnung zawk tih a chiang reng.

Round hnihna tan a ni, Biakkima chuan knock out tumin a nawr leh nghal bian bian. Rei an khel hman lo, Biakkima chuan Gerttipong a hnek lu hai leh ta. Biakkima a rang a, Gerttipong-a dul leh hmaiah a hnek zawt zawt, Round 2 minute 1 leh second 33-ah Biakkima chuan a hnek lu hai leh a, referee chuan fight a ti tawp ta, Technical Knockout-in NT Biakkima chuan hnehna a chang a, IBA Intercontinental Title a humhim ta a ni.

LPS Fight Night 2 results:

IBA Intercontinental title fight: NT Lalbiakkima(Mizoram,India) def Kumsahwat (Thailand) • T.K.O •

SUPER MIDDLEWEIGHT

H. Lalrinhlua (Mizoram) def. Subin Augustine (Hyderabad) Winner by Split decision.

LIGHTWEIGHT

HC. Lalramfela (Mizoram) def. Parash Chauhan (Gujarat) T.K.O 

SUPER WELTERWEIGHT

C. Lalhruaitluanga (Mizoram) def. Kamal Kant (Rajasthan)  T.K.O 

SUPER BANTAMWEIGHT

Sandeep Singh Bhatti (Punjab) def. F. Zoramchhana (Mizoram)  Split decision. 

SUPER LIGHTWEIGHT

Vanlalawmpuia (Mizoram) def. Suresh Pasham (Hyderabad)  T.K.O 

FEATHERWEIGHT

Laldingliana (Mizoram) def. Rohit Mehra (Haryana) T.K.O.

Copyright © inkhel.com 2024. All rights reserved.