Inrinni zan Premier League match-ah Newcastle United chuan si li faiin Tottenham an hneh a, hetih lai hian Manchester United chuan an khingpui Bournemount an inhnehtawkpui.

Khelh 32 atangin Magpies leh Red Devils te hian point 50 ve ve an hlawhchhuak a, Newcastle United erawh goal difference-a an chungnun zawk avangin, table-ah 6-na an ni a, Manchester United erawh 7-naah an tlathla ta a ni.

St. James' Park-ah Newcastle United tan Isak chuan goal hnih a khung a, Gordon leh Schar ten goal khat ve ve an khung. Top 4-a awm tum Tottenham dinhmun a tha lo ve telh telh bawk.

Vitality Stadium-ah Manchester United an vannei hle a, Solanke leh Kluivert ten Bournemouth tan goal an khung a, Man United tan Bruno Fernandes chuan goal hnih a khung.

Tan atanga minute 16-na lekah Solanke chuan goal a khung, Garnacho ball hloh chu Bournemouth lamin chhut zui nan an hmang a, Solanke chuan ball changin, Liverpool laka khel tha em em Kambwala a chesual, box pawn atangin Solanke chuan goal mawi tak a khung zui.

Minute 31-ah Man United chuan an siphurh an rul, box dinglam sir atanga Garnacho cross chu Zabarnyi chuan lo dang kangin, hei hi hnai set sawt atangin Bruno Fernandes chuan a ke veilam hmangin a hlap goal.

First half tawp dawn lamah Kluivert chuan mual neitu lam hma a hruaipui leh. Mual veilam sirah ball khalhin, box chhung a thlenpui hnuin near post lamah kawh zetin a chhuih goal.

Second half-ah Manchester United an vannei hle, Mainoo-a shot per kual chuan Smith-a ban a fuh, referee Tony Harrington chuan penalty a ham a, he penalty hi Bruno Fernandes chuan goal-ah chantirin, 2-2 in team hnih te an inhnehtawk.

Manchester United game a nawi leh hle, goal hlauhawm pawh an nei lem lo. First half tawp lamah Bruno chuan box pawn atangin Bournemouth goal bar a pet per a ni deuh mai chauh, a bak chu chance hlauhawm an insiam hleithei lo.

Bournemouth lam erawhin chance an nei nual, shots vawi 20 an neih laiin, United chuan shots vawi 8 chauh an nei. Kluivert chuan ball tha lutuk dawngin, free takin United goal-ah a shot, mahse Onana zawnah tak a kal hlauh.

Tin, Kerkez chuan goal khungna chance tha tak a nei bawk a, United goal bar a tauh per dawp bawk. Ball posessions-ah United chungnung hret mah se, goal attempts erawh an nei tam lo leh pek hle.

Tun season Premier League-ah United hian goal 47 an khung a, goal 48 an chhuah ve thung. An goal difference chu -1 a ni leh vang mai.