Ni 24 – 28, January 2022 chhunga MBA leh TATA Trusts te tangkawp in Mizoram Badminton Association Official Championship 2022 neih tura ruahmanna a lo siam tawh sa chu Sorkar SOP thar avangin tum angin neih chhunzawm theih a ni ta lo a. Hetih laiin category eng emaw zah ah chuan result hriat hman a niin tournament ropui tak kalpui hman a ni tho a ni.
Mizoram a Badminton in elna ah season khat chhung hian ranking tournament chi hrang hrang neih thin a ni a. Chung zinga lian ber, ropui ber, lawman sum fai tam berna leh ngaihhlut hlawh ber chu MBA Official Championship hi a niin ranking point pawh a let thawk a pu a ni.
Tun season a Official Championship pawh hian ngaihhlut a hlawh hle a, Mizoram hmun hrang hrang bakah phai lam Badminton Academy a inzir mek te pawh he tournament a tel tur hian an rawn haw khawm a ni.
MEN’S SINGLES AH CHAMPION THAR
Men’s singles in elna hautak takah tun tournament a seeded no 4 Lalnunhlua, Dawrpui Vengthar, Ralte Villa Badminton Club tana khel mek chuan final ah seeded no 7 Joseph Lalhruaitluanga, Bawngkawn Badminton Club chu hneh in a vawi khat nan tournament lian ah a Champion a, kum 21 lek a upa a la ni.
Nunhlua hi MBA Advance Coaching chhuak a ni a, he tournament atana a inbuatsaih nasat thu sawiin Krismas leh Kumthar vuakvet ah pawh exercise lak leh practice a thulh ngai loh thu a sawi.
Semi Final ah Tournament-a seeded no 1 Samuel Lalnunmawia pawh a vaw thla nghe nghe a ni. Ani hian Mixed doubles ah a partner F. Vanlalhriatpuii chu champion pui bawkin, final ah Laldintluanga Tlau leh Lalrinzuali te tangdun, inhliam vanga khel chhunzawm thei lo te chu walk over in an hneh a ni.
KUM 16 LEK A UPA A CHAMPION
Hmeichhe lam inelna hautak ber ah kum 16 leh thla 4 leka upa Abigail Lalthazuali, Saron Veng chuan Lalrinzuali, Ralte Villa Badminton Club chu final ah hneh in Women’s Singles Champion a ni a, Mizoram Badminton chanchin a Women’s Singles category a champion thei naupang ber a ni.
ITM University Badminton Academy a inzir mek Abigail-i hi senior category a a vawikhat champion-na a ni a, TATA Trusts in Mizoram a Badminton in hma a sawn theih nana Regional Development Center (RDC) a din atanga inchher chhuak a niin, kum 3 zet amah lo hrual tawhtu, Serchhip RDC Coach Albert Lalnunhlima chuan, “Mi tumruh a ni a, nikhat a a thiam theih loh pawh a thiam hma chu bei tang tang thin a ni.
Tin, a pa Pu Laltanpuia hian a tuipui em em a, ITM University lama a zuk zir belh hian nasa takin a pui bawk a ni” tiin a tumruh leh taimak zia a sawi. Women’s Doubles in elna ah Lalrinhluii leh Zothansangi, Ralte Villa Badminton Club te tangdun chuan F. Vanlalhriatpuii leh Lalrinzuali, Ralte Villa Badminton Club te tangdun chu deciding game ah an hneh bawk.
TRIPPLE CHAMPION NI THEI SERCHHIP NAUPANG DUHAWM REMPUII
Kum 14 leka upa Lalrempuii, Serchhip Ramthlun Veng chuan he Official Championship hi category thum (3) ah a khel a, a khelhna category zawng zawngah hian a champion vek.
Hetiang ang record ropui neih hi thil harsa tak mai anih lai in skill nei tha, mi tum ruh leh taima, in zir peih Rempuii tan thil theih loh a lo ni lo. Ani hi Serchhip RDC coach Albert Lalnunhlima hnuai a inzir a ni a, Under-19 Girl’s Singles, U-17 Girl’s Singles leh Under-17 Girl’s Doubles ah te a champion vek a ni.
MBA ranking tournament ah hian category thum (3) ah chiah a tel theih thin a, a aia tam ah tel theih ta se a champion vek tho ang em tih chu ngaihtuahna tithui thei tak mai a ni.
MUANAWMA A LA TAR LO
Kum 40 an pelh tawh chuan top level-a tharum hman tel a ngaihna infiamna ah mi tam tak chu an chawl tawh thin. Mahse, Lalmuanawma, Hlimen, Mizoram Police Badminton Club tana khel erawh in Men’s Doubles Champion nomawi a la chawi haw thei tlat! Inkhel hmuhnawm leh inhnehtawk takah Muanawma leh a partner Samuel Lalnunmawia, MPBC te chuan deciding set ah Lalrinawma leh Laldintluanga Tlau te tangdun, Bawngkawn Badminton Club tana khel te chu an hneh.
Mizoram Badminton inelna sang bera record nei tha ber anih chhunzawm zel bakah amah ang kumah top level a Champion thei hi an la awm lo a ni.
BADMINTON IN HMA A SAWN
TATA Trusts, Mizoram Badminton Association leh Mizoram State Sports Council te hmalakna a Mizoram hmun hrang hranga Grassroot Coaching Center din a nih hnu leh, chunga coaching kal, a tha zual an lak khawm te enkawlna tur Regional Development Center din anih hnu ah Mizoram ah Badminton game in hma a sawn nasa em em a. Tun hnai ah Mizo naupang eng emaw zah chu TATA Trusts te hmalakna hian Hyderabad a Pullela Gopichand Badminton Academy leh ITM University Badminton Academy, Raipur ah te thawn thlak an ni. Heng Academy a zirlai te hian tun Official Championship ah pawh result an nei tha hle a, game hmuhnawm tak leh hmasawn tak an rawn lantir thei a ni.
Under-19 Boy’s Singles Champion Saitluangpuia (Kum 16) hian hmanni lawk a Hyderabad a neih, All India Senior Ranking Badminton Tournament ah qualifying round atanga tan in, mi panga (5) ngawt a hneh hnu ah main draw a in vaw tling nghe nghe.
Tin, a nau Sainunmawia pawh in tun tournament hi khel tha lutuk lo mah se, tunhnai a neih zawh tak, Yonex Sunrise- Ashwani Gupta Memorial All India Junior Ranking Badminton Championship, Panchkula a neih ah Bronze Medal a vaw chhuak thei a ni.
He tournament result kimchang chu a hnuai ami ang hi a ni:
Men’s Singles Champion
Lalnunhlua, Ralte Villa Badminton Club
Runners Up: Joseph Lalhruaitluanga, Bawngkawn Badminton Club (BBC)
Women’s Singles Champion
A bigail Lalthazuali, Saron Veng Badminton Club (SBC)
Runners Up: Lalrinzuali, Ralte Villa BC
Men’s Doubles Champion
Lalmuanawma & Samuel Lalnunmawia, MPBC
Runners Up: Laldintluanga Tlau & Lalrinawma, BBC
Women’s Doubles Champion
Lalrinhlui & Zothansangi, Ralte Villa BC
Runners Up: F. Vanlalhriatpuii & Lalrinzuali, Ralte Villa BC
Mixed Doubles Champion
Lalnunhlua & F. Vanlalhriatpuii, Ralte Villa BC Runners Up: Laldintluanga Tlau, BBC & Lalrinzuali, Ralte Villa
BC U-19 Boy’s Singles Champion Saitluangpuia, Mission Veng Badminton Club (MBC)
Runners Up: H. Lalthazuala, Ralte Villa BC U-19 Boy’s
Doubles Champion
C. Lalramzaua, MBC & C. Lalrohlua, Serchhip Kawnpui Badminton Club (SKBC)
Runners Up: F. Lallawmzuala, Bethlehem BC & Laldinmawia, LALAT BC
U-19 Girl’s Singles Champion
Lalrempuii, SKBC
Runners Up: Ramdinmawii, SBC
U-19 Girl’s Doubles Champion
Liansangpuii, Vairengte Badminton Club & Ramdinmawii, SBC
Runners Up: Lalremfeli, SKBC & VL Hmangaihzuali, SPBC
U-17 Boy’s Singles Champion
H. Lalthazuala, Ralte Villa BC
Runners Up: Marcus Lalthanzuala, BBC
U-17 Boy’s Doubles Champion: Lalnuntluanga & Vanlalmalsawmzuala, Serchhip BC
Runners Up: C. Lalramsanga, MBC & Lalthazuala, Ralte Villa BC
U-17 Girl’s Singles Champion
Lalrempuii, SKBC
Runners Up: Zoramthari, Ralte Villa
BC U-17 Girl’s Doubles Champion
Lalrempuii, SKBC & Ramngaihzuali, Ralte Villa BC
Runners Up: Lalhlupuii Zadeng, SKBC & S. Lalruatpuii, BBC
U-15 Boy’s Singles Champion
Vanlalpekhlua Sailo, SKBC
Runners Up: Laldinmawia, HBC
U-15 Boy’s Doubles Champion
Malsawmhlua & Vanlalpekhlua Sailo, SKBC Runners Up: Joel Lalramdinmawia & Samuel R. Lalhmingsanga, Ralte Villa BC
U-15 Girl’s Singles Champion
H. Lalrinhlui, Ralte Villa BC
Runners Up: Zoramthari, Ralte Villa BC
U-15 Girl’s Doubles Champion
H. Lalrinhluii & Zoramthari, Ralte Villa BC Runners Up: F. Remruatsangi & JK Vanlalmalsawmi, Champhai Distric Badminton Association (CDBA)
U-13 Boy’s Singles Champion
Mesak Lalrawngbawla, CDBA
Runners Up: Ht Rohminghlua, DTBC
U-13 Boy’s Doubles
Champion: Benjamin Malsawmkima & Jonathan Lalremtluanga, BBC
Runners Up: Lalthuthlungmawia, Serchhip BC & Malsawmtluanga, Keitum BC