Zanin dar 12:30 ah hian Etihad Stadium-ah Manchester City leh Paris Saint-Germain te chuan UEFA Champions League semi final second leg an khel dawn.
Parc des Princes-a semi final first leg an khelhah Manchester City chu Kevin De Bruyne leh Riyad Mahrez te goal thun hmangin 2-1 in an chak a, final lut thei turin dinhmun tha zawkah an ding mek a ni.
Nikum lama finalist Paris Saint-Germain chuan an manager Mauricio Pochettino kaihhruaina hnuaiah final luh leh theih ngei an tum dawn a, 2019 ah khan Tottenham Hotspur a enkawl laiin Argentine coach hian quarter final-ah Manchester City chu a lo pet chhuak tawh a, zaninah pawh hian Premier League club chu lehthal theih ngei an tum dawn a ni.
Europe khawmualpuia inelnaa anni pahnih intawn tawhah Manchester City hi an la tlawm lo a, vawi hnih chu Premier League club hi an chak tawh a, vawi hnih chu an inhnehtawk tawh bawk a ni.
Manchester City hi UEFA Champions League match an khelh hnuhnun vawi 6 ah an la chak vek a, zaninah hian an chak leh a nih chuan English team zingah chuan European Cup/Champions League bika chak zawn rei thei ber an ni ang a. English team dang pathum chu a zawnin vawi 6 chak thei an lo awm tawh a, Manchester United (1965-66), Leeds United (1969-70) leh Arsenal (2005) te an ni.
Paris Saint-Germain hi UEFA Champions League knockout match an khelh hnuhnunah first leg lama an chak loh hnuin an khelhpuite chu second leg lamah an lehthal leh thei a. Borussia Dortmund chu first leg-ah 2-1 in an chak a, second leg an khelh leh hnuah PSG chu 3-2 in an chak thei a. Chutih rualin Europe bikah hian French club hi first leg-ah an khelmuala an chak loh hnuah chuan an tlang zui ngai miah lo a ni.
English club Manchester City hi an chak a nih chuan kum 51 hnua European final an luh hmasak ber a ni dawn a, 1970 Cup Winners’ Cup final-h Gornik Zabrze hnehin title an la a, kha bak kha chu final an lut leh thei ta miah lo a ni.
Tun season chhungin Manchester City chuan UEFA Champions League match 11 an khel tawh a, hengah hian vawi 10 an chak thei a, vawi khat chu an khelhpuite nen an inhnehtawk a, hengah hian goal 23 lai an thun tawh a, goal 4 chu an chhuah ve tawh bawk a ni.
Pep Guardiola pawlte zingah hian inhliam tharlam an awm hran lo a, Inrinnia Crystal Palace nen an inkhelh khan striker Sergio Aguero pawh a inlan ve leh thei tawh a, zaninah pawh chhawr theih tura ngaih a ni.
PSG striker Kylian Mbappe chu a inhliam deuh avangin Inrinnia Lens nen an inkhelh pawhin a tel lo a, zaninah erawh a inlan theih an beisei a. Right-back Colin Dagba chu Lens nen an inkhelhin a ke rek a na a, hei vang hian tel thei lo tura ngaih a ni a. Idrissa Gueye chu red card a hmuh vangin an hrem a, zaninah pawh a inlan theih loh phah ang.
Zanina inlan thei tura ngaih te:
Manchester City: Ederson; Walker, Dias, Stones, Cancelo; Rodri, Gundogan, Silva; Mahrez, De Bruyne, Foden
Paris Saint-Germain: Navas; Florenzi, Kimpembe, Marquinhos, Bakker; Parades, Herrera, Verratti; Neymar, Mbappe, Di Maria