Hlawhtling taka Liverpool enkawltu Jurgen Klopp hun a ral zel a, tun thlengin a hmunruaka awm tur ala chiang thei lo.
German manager hian a chhuak dawn tih a sawi rualin khawvel a dengchhuak a, tunge thlak ang tih zawhna a tam hle. An lamrik nasat ber Xabi Alonso-in Bayer Leverkusen atanga inputchhuah a tum lova, Brighton boss Roberto de Zerbi leh Sporting Lisbon coach Ruben Amorim-te hming pawh a langsar hle.
De Zerbi hi The Reds fan-te'n an hre chiang sa a, Amorim erawh an la hmelhriat lutuk lo. Amorim hian nakkum Pawlkut thlaah kum 40 a tling dawn chauh a, European manager zingah a buk a rit tan hle. 2021 khan Portuguese Primeira Liga-ah Sporting a champion pui a, kum 19 hnua league title an lak lehna hmasa ber niin kum 36-a upa lek a ni bawk.
2017 Tau thlaah inkhelh chawlhsanin coaching a luhchilh a, Bragae reserve team atanga bultanin first team-ah a kaisang thuai. Braga senior team a enkawl lai hian kum 65 hnua a vawi khat nan Benfica an hneh a, game 13 an khelh atangin chak result vawi sawm an nei. A chanchin leh sulhnin Europe club liante beng a thleng thuai a, Portugal-a awmzui thlangin Sporting a zawm.
Sporting hian Braga atanga leichhuah nan £8.6m an seng a, 2020 Vau thlaah niin an tisual lo. Manager awm tawh zinga to ber pathumna hian Sporting a chawisang a, sum an eng thlawn lo tih lantirin team tha tak a din. Tlawm nei lova game 32 an kaltluan hnuah Portuguese league cup an la a, kum 20 chuang an nghah tawh league title pawh an hlawhchhuak teuh hle.
Portugal tana a khelhpui thin Liverpool defender hlui Abel Xavier chuan, "Min nunnem leh kawm nuam tak a ni a, a tumah a chiang em em bawk. Braga a zawm tirhin danglamna a thlentir a, player ngai leh squad ngai reng chhawm chhungin team tha tak a nei. A ruahmanna neih leh a rilrua awmte a vawng reng a, thil danglam ti turin mamawh a ngah lem lo. A tha tawk tih hre chiangtu Sporting-in an hel thuai a, an tisual lo tih kan hre theuh awm e." tiin BBC World Service-ah a sawi.
Amorim hian khelh dan phung nghet tak a nei a, Premier League-a khel mek zingah a hnuaia awm thin pathum - Matheus Nunes (Manchester City), Pedro Porro (Tottenham) leh Joao Palhinha (Fulham)-te an awm. Player pathumte hian 2020-21 season-a Primeira Liga an chawi theihna turin an thawhhlawk em em a, an that avangin Portugal an chhuahsan har lo.
Amorim hian 3-4-3 formation hmangin a naute a remkhawm deuh ber a, winger pangngai aiin wing-back a hmang tam zawk. Klopp hnuaia Liverpool khelh dan ang deuhin, ball an chan chhunah an nawr let vak a, ball an chan loh lai pawhin an tumpuite nawr beh reng an duh. Amorim hi a hnuaia awm tawh thinte'n an fak a, ala kaihhruai ngai lohte pawhin an dah hniam lo.
Palhinha chuan, "Thiamna leh theihna nei tha a ni a, game a hriat chian bakah player-te'n an nel em em bawk. Braga atanga tun thlengin fak lo an awm lova, Portuguese manager ni mek zinga tha ber pakhat a ni." tiin O'Jogo hnenah a sawi.
Kum 29 mi hi Manchester United captain Bruno Fernandes pawhin a dahsang a, ram dangah insawn pawh nise a buai a ring lo. Amah nena an sawizawm ber Liverpool hian, rawlthar an hmang nasa a, tun season-ah pawh Conor Bradley leh Jarell Quansah-te an chhawrrim hle. Player naupang chhawr tam hi Amorim duh dan a ni a, a team enkawl tawhah kum lama naupang an langsar zel.
Primeira Liga-a an champion tumin Nuno Mendes a phochhuak a, hemi season-ah hian Pedro Goncalves pawhin goal 23 a khung. Goncalves hian Amorim hnuaia an awm hnuah hma a sawn nasa a, season tinin goal sawm aia tam ala khung zat zat. Amorim kaihhruaina hnuaiah Sporting an harhchhuak a, sum peipun chiah tum thin khan nomawi chawi lamah rilru an pe leh tawh a ni.