Paolo Maldini thatzia sawi nawn a ngai lo. AC Milan captain hlui hi khawvela defender awm tawh zinga tha ber pawl a ni a, Serie A ropui vanglaia Milan captain hian player ropui tak tak hmachhawn tawh mah se Diego Maradona aia tha tih a nei lo.

Milan tana kum 25 zet khel Maldini hian Milan tan Serie A title 7 zet a chawi hman a, club inelna sang ber leh mi tam takin World Cup aia inelna sang zawk nia an ngaih Champions League-ah tum 5 lai a champion bawk. 

Milan tana game 900 chuang a khelh chhungin khawvela player tha a hmachhawn kim hman hle a, Maradona tluka tha tih a nei lo thung.

Italy tana game 126 zet khel thei Maldini chuan, "Player ka hmachawn tawh zinga tha ber chu Maradona kha a ni. A chhan sawi theih awlsam ber chu Maradona a nih vang a ni, khelmual chhunga pawh zahawm takin a khawsa thin a ni," tiin mi tam takin khawvela footballer tha ber tia an sawi Maradona a dahsang hle.

Napoli tana Maradona khelh hunlai hi Serie A vanglai tak tak tia sawi theih a ni a, khawvela player tha ber ber khelhna league a ni. 

Europe lam thlenga Italian club an ropui lai hian Maldini chuan Ronaldo, Zinedine Zidane leh Michel Platini-te ho kar tin a hmachhawn thin a ni.

Kum 41 mi nia inkhelh chawlhsantu Maldini chuan sawi chhunzawmin, "Maradona hnuah chuan Ronaldo kha a ni ang. A hliam hmaa Inter tana kum hnih a khelh lai khan a tha rem rem khawp mai, tha tak a ni. Zidane leh Platini-te pawh kha an tha khawp mai," tiin Ronaldo that zia a sawi nasa hle.

Maradona, Ronaldo leh Zidane-te'n World Cup-ah an ram an champion pui vek thei a, an ram inngahna player an ni phak vek a ni. 

Platini hian Euro-ah France a champion pui a, goal khung hnem ber a ni bawk. Maldini-a'n player hmachhawn harsa a tih te hi fak chawp ngai lo a, khawvela player ropui tling pha vek a ni.