Anfield-ah Liverpool chu a zawnin an tlawm a, kar laihawlah Atalanta an hneh lo, Pathianni zan Premier League match-ah Crystal Palace hmachhawnin, Eze goal khat hmangin si khat faiin mikhual team an chak.
Chak loh chu sawi loh, draw pawh a pawi tawh. Chutih laiin Liverpool an chak lo tlat mai, hma hruai lehna hun tha tak nei mah se, an bawhpawlh ta a. He chanchin ziah laia league hmahruaitu Manchester City chu point 2-in an phak lo a ni.
Anfield-ah Liverpool-in inkhelh bul an tan tha lo, tan atanga minute 14-na lekah box veilam sir atanga Mitchell cross chu awlsam takin Eze chuan a chhuih lut.
He goal a luh atanga minute 4-na lekah Liverpool chuan goal dang an chhuah leh teuh kher mai. Mateta chuan free ball umin, Alisson khawih phak lohin goal-ah a chhuih, mahse Robertson chuan goal line atangin a clear hlauh mai.
Second half-ah Mateta chuan goal a khung teuh hle bawk, Andersen-a tauh thlak chu hnai set sawt atangin a pet, pen hnih khat leka hnaia lo awm Alisson chuan a lo dang hlauh mai.
Liverpool hian inkhelh an thunun a, chance pawh an nei hnem kher mai, mahse Crystal Palace tlarhnung a phui tha a, goal an khung thei lo. Tin, Liverpool hmatawng te hian goal an hlah hnem bawk a ni.
Endo chuan Palace goal bar a pet per a, Diaz-a volley chu Henderson chuan a lo dang bawk. Box pawn atanga Salah shot chu Henderson chuan tha lutukin a lo dang bawk.
Darwin Nunez chuan an siphurh rulhna hun remchang tak second half tir lamah a nei, hnai set sawt atangin a hlap, keeper a hlap per.
Hnai tak atanga Jota pet pawh Anderen chuan goal line bul atangin a lo dan sak a, Salah pet goal tur pawh Mitchell chuan a lo dang bawk.
Liverpool chance tha em em pakhat chu counter attack kha niin, Curtis Jones chuan Henderson chiah a hmachhawn tawh tihin a pet out.
Liverpool hian shots vawi 21 lai an nei a, goal zawnah vawi 6 an pet a, ball posessions 70% an nei. Game thunun viau mah se an vanduai zan a thleng a ni, goal an hlah malh malh a ni ber mai.
Premier League-ah a zawna game 28 zet an tlawm tawh loh hnuin, Liverpool chu Palace lakah an tlawm. Competition hrang hranga an game hnuhnung pathumah vawi 2 an chak lo a, vawi khat an khingpui an inhnehtawkpui.
Liverpool kutah title a awm ta lo, Manchester City leh Arsenal te chetsual an chan a ngai dawn ta. Klopp chuan tun season zawh ruala Reds chhuahsan a tum, title nena chhuahsan tum viau mah se, Europa league leh Premier league title an beiseina an chuai mek a ni.