Tun season tawp ruala Jurgen Klopp a chhuah dawn avangin Liverpool chuan German manager thlakna tur an zawng mek a, coach chi hrang hrang an dawr kual a, tunah chuan Feyenoord head coach Arne Slot chu an mal khalh ta.

Kar tir lamah khan The Athletic chuan Feyenoord leh Liverpool te hian inbiakna an la neih loh thu an tarlang a, nilaini khan Fabrizio Romano chuan party pahnih te hi an indawr ngei tih a rawn sawi chhuak.

Liverpool chuan Slot hi an dawr mek tih report a ni a, indawrna pawh a kaltluang hle a, Slot pawhin Anfield-a boss nih a hreh lo niin Fabrizio chuan a tarlang.

Slot hian Feyenoord chu KNVB Cup a chawipui fel zo chiah a, season hmasaa Eredivisie title an lak theih nan pawha thluak bur a ni. A game khelhpui dan leh Liverpool khelh dan hi a inang nia ngaih a ni a, Slot hian attacking football hmuhnawm tak a team te a khelhpui thin.

Nikum khan Tottenham pawhin Slot hi an lo dawr viau a, mahse Dutch coach hian London club hi a hnar a nih kha. Slot hian release clause a nei o a, Feyenoord-a a contract hi kum 2026 thleng daih a ni mek.

Release clause a neih loh avangin a chhuak dawn a nih chuan, Feyenoord chuan sum thahnem tak phut an tum niin The Athletic chuan a tarlang.

Liverpool leh Slot te indawrna a kaltluang, Liverpool hian Feyenoord an la dawr leh ang a, chutah chuan thil a chiang chho tawh tura ngaih a ni.