Leeds-in Marcelo lak dan an ngaihtuah

16th June 2021, 01:06PM

Premier League club Leeds United chuan Real Madrid left-back Marcelo chu tun nipui bazar chhunga lakluh an duha, lakluh dan tur an ngaihtuah mek niin Spanish leh English chanchinbu te chuan an tarlang.

Brazilian fullback Marcelo hi Real Madrid manager thar Carlo Ancelotti chuan chhawr tam a tum tawh lo niin tarlan a ni a, hemi avang hian Marcelo hian kumin nipui chhung hian Real Madrid a chhuahsan dawn anga sawi a tam hle.

Marcelo hian Real a chhuahsan dawn a nih chuan England emaw Italy emaw pan a duh niin sawi a ni bawka, Ancelotti-a chhuahsan tak Everton pawh Marcelo lalut duh zingah sawi tel an ni ve mek.

Leeds hian an left back Ezgjan Alioski chu contract thar chungchangah an la hmin thei lova, Alioski hian contract thar a ziak lo a nih chuan thla thar atang hian free agent a ni dawna, Leeds hian left-back thar an lak ngei a ngai dawn.

Leeds ian kum 33 mi Marcelo hi Everton an inchuh a ngai dawn niin a langa, Marcelo-a man hi pound maktaduai 5 vel ni tura chhut a nih a, kum hnih daih contract tal ziah a duh nia sawi a ni bawk.

Marcelo hi Real Madrid-ah a awm rei tawh hle a, kum 2007 atang khan Los Blancos tan khel tawhin, a trophy chawi tawh zingah La Liga title panga bakah, UEFA Champions League nomawi pali a tel a ni.

Copyright © inkhel.com 2024. All rights reserved.