Bellator Featherweight Champion AJ Mckee chuan Bellator 263 khan minute khat leh second sawmnga pasarih chhungin Patricio Pitbull a réh tlawm hnuin a pawr zui hle.

Mckee chuan, "MMA khawvelah kei aia featherweight fighter tha an awm lo. UFC, PFL, One FC ni rawh se, khawvel featherweight fighter-ah ka tha ber. Kei aia tumpuite hnehsawh an awm lo, " tiin a inhrosa nasa hle.

Mckee chuan featherweight huanga khelh reng chu harsa a tih thu sawiin, "Ka taksa a lian zela, lightweight-ah ka khelh thuai a ngaih ka ring. Tunah hi chuan ka la khel thei ve zel chu nia. Hun lo kal zelah erawh ka taksa hian tlinloh hun te pawh a la awm thei. Tun dinhmunah hi chuan 145 pounds huangah tih leh tur chuang ka nei lo.

He division-ah hian khelh reng pawh ka tum  lutuk tawh lo,  ka hmaa ding apiang awlsam takin ka hneh zel, division hniha champion hi ka mitthla reng mai, " a ti bawk. UFC fighter zinga  a insualpui chak an zawhna pawh chhangin, "UFC fighter ka hmachhawn chak deuh pakhat  chu Max Holloway. Thir hung chhunga insualpui turin ka peih reng, " a ti zui.

Bellator MMA hi mi tam tak chuan UFC laka hniam tak turah kan ngai thin. Tuna Bellator Champion AJ Mckee-te hi a tumpui apiang la hneh vek anih bakah Bellator 263-a a hneh tak Patricio Pitbull te pawh UFC lightweight top contender zinga ngaih  Michael Chandler pawh first round-ah lo tukdal  tawh a ni.

Heng atang hian fighter tha ve tawk tak a ni tih chu a chiang reng. Nakin zelah chuan UFC-ah AJ Mckee hi kan la hmu mahna. Boxing ang deuha champion vs champion innuai te hi han awm thei ngat se, UFC Featherweight fighter tawrawt tak tak Volkanovski, Ortega, Holloway-te  a hneh ngat anih chuan khawvela featherweight fighter tha bera chhal a ni ngei ang. Tun dinhmunah erawh tha ber tiha sawi theih a har rih a ni ber.