Juventus-in Chiellini contract thar an ziahpui

03rd August 2021, 01:08AM

Serie A club Juventus chuan an veteran defender kum 36 mi Giorgio Chiellini chu kum hnih daih contract thar an ziahpuia, Chiellini-a contract thar hian kum 2023 June thla thleng a daih a ni.

Chiellini hi Juventus-ah season 16 lai a awm tawha, a season 17-na tur atan inbuatsaih mekin, a contract hi a hmang zo a nih chuan Juventus-ah season 18 lai a awm dawn tihna a ni.

Upa ve viau tawh mahse Chiellini hi centre-back tha tak a ni a, Euro 2020-a Italy an champion na kawngah pawh Chiellini hi Italy tlarhnunga player pawimawh ber pakhat a ni.

Euro-ah Leonardo Bonucci nen Chiellini hi Italy tan an inkawp fuh hle a, Germany midfielder hlui Bastian Schweinsteiger chuan Bonucci leh Chiellini-te hi tunlai centre-back tha ber an nih thu a sawi nghe nghe.

Chiellini hian June thla ral rual khan Juventus-a a contract  a hmang zova, July thla chhung zawng free agent a nih hnuah Juventus hian an captain hi contract thar an ziahpui ta a ni.

Chiellini hi Italian club Livorno academy chhuak a ni a, kum 2002 khan Roma panin, kum 2004 khan Juventus hian an leia, Juventus a pan tirh hian Fiorentina-ah loan-in a khel tih bak chu Juventus tan bak a la khel leh lo.

Italy youth team lama a inlan hnuah kum 2004 atang khan Italy senior team-ah koh niin, Italy senior team tan hian vawi 112 zet a khel tawha, goal 8 a khung tawh bawk a ni.

Copyright © inkhel.com 2024. All rights reserved.