Jurgen Klopp: 54

16th June 2021, 08:06PM

Liverpool manager Jurgen Klopp chuan vawiinah hian kum 54 a tling ta a, kum khata a upat belh niah hian a chanchin thenkhat han thlir kual ila.

Jurgen Norbert Klopp hi June 16, 1967 ah khan Stuttgart khawpuiah a piang a. Norbert leh Elisabeth te fa pathum zinga a naupang ber niin, a pa chu sumdawng a ni a, goalkeeper te pawh a lo ni tawh thin a. A pa hian football khel tur hian a nawr thin a, a pa vanga inkhel chho hi a tih theih.

Football a khelh ve thin laia a hun tam zawk chu Mainz 05 ah a hmang a, a tirah chuan striker a ni thin a, a hnuah chuan defender a ni leh ta daih thung a. Mainz 05 tan hian game 346 a khel hman a, hengah hian goal 56 chu a thun a ni.

Football a la khelh lai, 1995 kumah khan Jurgen Klopp chuan Frankfurt khawpuia Goethe University atangin diploma in sports science a zir chhuak a. A thesis chu football lampang a ni lem lo thung a, kea kal lampang daih a ni.

2001 ah khan Klopp chuan football khelh a chawlhsan a, Mainz 05 manager a ni zui a, 2004 kumah khan Bundesliga lamah a kai chhohpui thei a. 2006-07 season-ah khan Bundesliga atangin an tla thla leh a, an kai chhoh leh theih mai loh avangin Klopp chuan 2008 ah khan banna a theh lut a, an club manager ni rei thei ber a ni.

Mainz 05 a chhuahsan hnuah hian Borussia Dortmund a enkawl ve leh a, 2010-11 eason-ah khan Bundesliga title a lakpui a, 2012-13 season-ah khan UEFA Champions League lamah pahnihna a nihpui zui a, 2015 ah khan Dortmund hi a chhuahsan a, an club manager ni rei thei ber record a siam a ni.

Klopp hi 2015 ah Liverpool manager atan an la lut a, Premier League club hi 2018 leh 2019 ah te khan UEFA Champions League final a luhpui thei a, final an luh hnuhnung zawkah phei hi chuan an champion zui a. Europe khawmualpuia Liverpool a champion pui hmasak ber niin, Reds hi vawi ruk an champion na a ni thung.

2018-19 season Premier League lamah Klopp leh a pawlte chu pahnihna an ni a, he mi tumah hian point 97 an hmu a, England rama division sang berah chuan title la pha lo team zinga point hmuh hnem lamah pathumna an ni.

2019-20 season-ah khan Liverpool chuan UEFA Super Cup an lak bakah FIFA Club World Cup an la bawk a. Hei aia pawimawh lehzual chu a vawi khatna atan kum 30 chhung an lo nghahfak tawh Premier League title chu Klopp hian Liverpool hi a lakpui a, point 99 lai an hmu nghe nghe a. A che tha chho bawk a, Jurgen Klopp hian 2019 leh 2020 ah te khan FIFA Coach of the Year chawimawina a dawng thei a ni.

Jurgen Klopp hian 2011, 2012 leh 2019 kumah te khan German Football Manager of the Year chawimawina a lo dawng tawh a. Tun thleng hian Premier League Manager of the Month chawimawina vawi 8 a dawng tawh a, Best FIFA Men’s Coach atan an thlan tawh bakah IFFHS World’s Best Club Coach chawimawina chu 2019 ah khan a lo dawng tawh bawk a ni.

Dangdai ve deuh chu Klopp hian Bollywood a ngaina hle niin an sawi a, film lampangah pawh 1975 kuma Ramesh Sippy film siam lar tak Sholay kha a duh berte zinga mi niin a sawi a ni.

Copyright © inkhel.com 2021. All rights reserved.