Jorginho thawhrah ve ve sengin Chelsea leh United an inhnehtawk

29th November 2021, 12:11AM

Sunday zan Premier League inkhelah Chelsea chuan Stamford Bridge-ah Manchester United an lo mikhual a, team hnihte hi 1-1 in an inhnehtawk.

Chelsea tan hian Jorginho chuan penalty spot atangin goal a khung a, United tan hian Jadon Sancho chuan goal a khung bawk a, Chelsea leh United te hian point khat ve ve an hlawhchhuak.

Chak zo lo mahse Chelsea hi league hmahruaitu an la ni chhunzawm zel a, khelh 13-ah point 30 an hlawhchhuak tawh a, an hnuai chiaha awm Manchester City nen point khatin an inthlau. United hian khelh 13-ah point 18 neiin, pariatna dinhmun an hauh ve mek a ni.

Chelsea 1-1 Manchester United

(Jorginho 69’pen) (Sancho 50’)

Player Ratings

Chelsea: Mendy 5; Chalobah 7, Silva 7, Rudiger 7; James 7, Loftus-Cheek 6, Jorginho 7, Alonso 7; Ziyech 8*, Werner 6, Callum Hudson-Odoi 6. Subs: Pulisic 7, Mount 6, Lukaku 6.
 
Man Utd: De Gea 7; Wan-Bissaka 6, Lindelof 6, Bailly 6, Telles 6; Fred 6, Matic 6, McTominay 7; Fernandes 6; Rashford 7, Sancho 7. Subs: Ronaldo 5, Lingard 6.

Minute thum chuang hret an khelhin Chelsea in chance tha tak an nei a, Thiago Silva ball vawrh chu mual veilama awm Marcos Alonso chuan Callum Hudson-Odoi a kalkawngah a tauh thla, Hudson-Odoi hian box chhung veilam atangin goal-ah pet mahse David de Gea chuan a ke in a lo save a, save tha tak a ni.

Darkar chanve chiah an khelhin Antonio Rudiger chuan box pawn atangin kawh zetin ball a shoot a, shoot tha hle mahse crossbar a pet per a, Chelsea tan a uiawm hle. Half time hma minute sawm vel a la awmin, Bruno Fernandes chuan ball a pe sual a, Hudson-Odoi chuan ball chang chhunzawmin, box-ah a luhpuia, mahse Hudson-Odoi hian a chance neih a hmang tangkai thei lo.

Half time hma lawkin Chelsea in free-kick an hlawhchhuak a, Reece James-a'n free-kick atang a ball vawrh luh chu box chhungah tu mahin an lo khawih lova, goal hmaa ball a sawh hnu lawkah De Gea chuan a lo beng chhuak thei hram.

First half-ah Chelsea hian inkhel an thunun hle a, United half lamah an inkhel a ni ber. United hian shot on target an nei lova, Chelsea erawh chance an ngah hle thung a, goal erawh first half-ah hian a lut lo.

Second half-ah erawh UEFA Best Player Jorginho a che sual a, second half tir teah Chelsea hian corner hmuin United lamin an clear. Chelsea-in an dah ban awmchhun Jorginho chuan ball kang a la sual chiang hle a, Sancho-a’n ball chang chhunzawmi, Chelsea goal lamah chak takin a khalh phei a, box a luhpui hnuah Sancho hian cool taka finish zuiin, beisei loh zawk leh bet zawk United-in hma an hruai.

Goal an khung hnuah United bet lutuk a rawn ziaawm chho a, an khel pawh a hma aiin a tha zawk. Mahse 70mins hma hretin Chelsea hian corner hlawhchhuakin, corner atanga ball vawrh luh chu Aaron Wan-Bissaka chuan lo clear tum mahse Silva-a’n a pet khalh a, Wan-Bissaka hian Silva chawnah petin, Chelsea-in penalty an hlawhchhuak. Jorginho chuan penalty spot atang hian goal khungin, Chelsea si phurh a rul.

Chelsea hian hnehna chan tumin theihtawp an chhuah a, an manager Thomas Tuchel pawhin forward player a dah luh belh nual. United erawh a tir atangin defensive midfielder pathum nen khelin, Chelsea laka point khat hlawhchhuah an pawi ti lo tih a lang a, hun tawp lamah pawh hun an khawhral lui nasa a, Eric Bailly chuan hun a khawhral avangin yellow card a hmu nghe nghe a ni.

Inury time a kal fe hnuah Chelsea hian chance tha tak nei mahse Antonio Rudiger chuan box chhung atangin goal-ah ball pet luh tum mahse goal a pet khum luah a, Chelsea tan a uiawm hle. 1-1 in inkhel a tawpa, Chelsea tan result a lungawithlak loh rualin United tan erawh an form enin result tha tak a ni thung a ni.

Copyright © inkhel.com 2024. All rights reserved.