India T20 captain a nihna atangin Kohli a bang dawn

16th September 2021, 08:09PM

Indian batsman Virat Kohli chuan thlaleh atanga khelh tur Twenty20 World Cup zawhah India T20 captain a nihna chu a bansan dawn tih a sawi.

Kum 32 mi Kohli hian T20 a chawlhsan dawn loh thu a sawi a, mahse a rim em avangin T20 captain a nihna chu bansan a tum thu a sawi a ni.

Thlaleh ni 17 atanga November thla ni 14 thleng T20 World Cup khelh a ni dawn a, hemi atan hian India chuan an squad puang tawhin, Kohli captain a ni a, tun World Cup bak chu Kohli hi India T20 captain a ni tawh dawn lo.

Kum 2017 atang khan Kohli hi T20 captain atan ruat a ni a, India tan T20 game 90 khel tawhin, run 3159 lai a siam tawh a ni.

Kohli chuan, “Kan hna ngah dan hriat thiam hi a pawimawh em em a, kum riat emaw kum kua emaw vel chhung chu hna ka ngahin ka rim hle a, hun awl ka insiam deuh a ngaiin ka hria. T20 captain ka nih chhungin team tan theihtawp ka chhuah a, T20 tan hian batsman angin theihtawp ka chhuah chhunzawm zel dawn a ni,” a ti.

Copyright © inkhel.com 2024. All rights reserved.