IBA title chuha inhnek tur NT Lalbiakkima

21st July 2021, 08:07PM

Mizo boxer chhuahvawr Nutlai Lalbiakkima chu boxing ring chhungah a lut dawn hnai a, August 6 ah khian Mumbai khawpuiah IBA Intercontinental title an inchuh dawn a, Punjab boxer Sandeep Singh nen an inhnek ang.

Kum 24 mi NT Lalbiakkima hian nikum lawkah khan a vawi khatna atan professional bout a khel ve chiah a, light flyweight division-ah telin, round hmasa berah TKO in a chak nghal a. Tun tuma Mumbai khawpuia Marine Center-a an inhnek tur hi professional bout a khelh hmasak ber dawttu a ni dawn a ni.

NT Lalbiakkima hi Marine Pro Boxing promotions chuan thuthlung an ziahpui a, Devraj Das chuan a promote bawk a, hetiang hnuah hian title fight hi a nei thei dawn a. Amateur huangah pawh khan Biakkima hi a che tha thei viau mai a, Astana Kazakhstan-a President’s Cup tournament-ah pawh Olympic champion lo ni tawh Hasanboy Dusmatov chu a lo hneh tawh a ni.

Mizo boxer dang Laldingliana pawh Mumbai khawpuiah hian a inlan ve dawn bawk a, professional huanga a vawi khatna atan a inhnek ang a, a hmachhawn tur chu Vinod Vanteddu a ni ang.

Bout dang pawh a awm nual dawn a, hetah hian Vimal Punera chu a inlan dawn bawk a, Uttar Pradesh boxer Hans Raj nen an inhnek ang a. Anni pahnih hi co-main event-a inhnek tur an ni a, IBA Asia title an inchuh dawn a ni.

Kamal Kant leh Sagar Nandu Salunke te chu an inhnek dawn a, Bikram Priyar leh Sachin Mandhotra te an inhnek dawn bawk a. Anni bakah hian Payal Sharma leh Neelam te chu inhnek tur an ni a, Inderjeet Singh chu a hnekpui tur an la ti chiang chiah lo a ni.

Tunlaiah coronavirus a darh nasat avangin Navi Mumbai hmuna Marine Center-a an inhnek hunah hian entu mipui an awm thei dawn lo a ni.

Copyright © inkhel.com 2021. All rights reserved.