Kumin chhunga Golden Boy Award dawng thei turin mi 100 hming an chhawp chhuak tawh a, hetianga an chhawp chhuah zing atang hian a tha ber an thlang chhuak leh dawn a. Sports journalist rualin kum 21 hnuai lam zinga footballer tha ber an thlan chhuah thinah hian nikum lamah Erling Braut Haaland chuan chawimawina hi a dawng a ni.
Mi 100 an chhawp chhuah atang hian mi 20 an thlang chhuak leh ang a, October 15 velah chuan Golden Boy ni thei tur 20 chauh an awm tawh ang a. Chu mi hnuah mi 5 an thlang chhuak leh ang a, a tha ber chu an thlang ve leh dawn a ni.
He chawimawina sawi fiah dan awlsam ber chu footballer kum 21 aia upa lo ho tana Ballon d’Or a ni a. Nikumah khan Red Bull Salzburg leh Borussia Dortmund tana che tha em em mai Erling Braut Haaland chuan chawimawina hi a dawng a. Kumina he chawimawina dawng thei tura chhawp chhuah zinga a beiseiawm zual nia ngaih mi panga han thlang chhuak ila.
5. Bukayo Saka, Arsenal
Arsenal chuan kum 19 mi winger tha deuh mai Bukayo Saka hi an chhawr tangkai chho hle a, vawi eng emaw zat chu goal thun leh mi goal thun tur siamsak kawngah pawh a langsar tawh a ni.
A tir takah chuan left-back angin English rawlthar hian a khel thin a, a hnuah chuan right-winger angin a awm chho a, central midfield lamah pawh a tul chuan a khel thei bawk a. Ball a kawl ngheh theihna te, a khaw thlir zau tak mai te chu a thatna langsar tak mai a ni.
Tlar hma lamah a tangkai thei hle a, lehlam pawl nawr kawngah a rintlak viau a, an khelhpui defender te tan chuan harsatna tam tak a siam fo thin a. Season hman zawh takah khan Saka hian game 46 khelhah goal 7 a thun bakah mi goal thun tur vawi 10 a siamsak bawk a ni.
4. Mason Greenwood, Manchester United
Manchester United leh England forward kum 19 mi Mason Greenwood hian 2019-20 season kha a hmang tha hle a, 2020-21 season erawh duh angin a hmang fuh ta chiah lo thung a. Heti chung hian Ole Gunnar Solskjaer chuan dawhthei takin a enkawl a, season tawp lamah chuan a che fuh leh thei tawh a ni.
Kumin October thlaa kum 20 tling tawh tur Mason Greenwood hian tun hnaia game 14 a khelh hnuhnungah goal 8 a thun a, mi goal thun tur vawi khat chu a siamsak bawk a. Season hman zawh takah khan inelna hrang hrangah game 52 a khel a, hengah hian goal 12 a thun tling a, mi goal thun tur vawi 6 chu a siamsak bawk a ni.
3. Ryan Gravenberch, Ajax
Netherlands leh Ajax holding midfielder Ryan Gravenberch hi Ajax academy lar tak atanga inzir chhuak a ni a. A kum la tlem mah se khelmualah chuan a naupang tawh hauh lo a, player puitling tak a ni tawh tlat a ni.
Kum 19 mi Gravenberch hi a khaw hawi a zau a, a thluak a fim em em bawk a, a ball pass dik em em mai hmangin tlar hma lampang a chawm tha thei viau mai a. Hla deuh atanga goal thun te pawh a ti thei a, tun season hman zawh takah khan Ajax tan game 47 a khel a, hengah hian goal 5 a thun a, mi goal thun tur vawi 6 a siamsak bawk a ni.
2. Pedri, Barcelona
Spain leh Barcelona central midfielder kum 18 mi Pedri hi La Masia atanga inzir chhuak a ni a, la naupang viau mah se a chet vel dan leh a ball pass dan velah Andres Iniesta nen pawh an khaikhin nghal der tawh a. Ronald Koeman kaihhruaina hnuaiah pawh Barcelona tan bul a tan chho hnem hle.
Barcelona chuan Las Palmas atangin 2019 ah khan an la a, 2020 atanga Barcelona enkawltu Ronald Koeman chuan bul tan tur khawpin a tha tawk tih a hria a, bul a tantir chho fo reng a ni. A tir takah chuan right-wing lama khel thin a ni a, Koeman chuan a laia awmtir chi nia a hriat avangin a khelhna hi a thlak a, a ti fuh hle.
1. Jude Bellingham, Borussia Dortmund
Kum 18 pawh la tling lo Jude Bellingham hi European Championship khel thei zinga naupang ber a ni a, kum 17 mi Borussia Dortmund midfielder hian UEFA Champions League lamah pawh khan thawm a nei lian hle.
Birmingham City player thin Jude Bellingham hian hma a sawn chak em em mai a, a ball khawih a dik hle a, hmun chep tak tak karah pawh ball a tlan chhuahpui thei fo thin a. A ball pass a dik viau mai a, rawlthar zingah chuan amah ang tluka tha hi an tam lo hle.