Football leh rimawi

04th May 2021, 07:05PM

Football khel thin te hian engtik lai pawhin football chauh an buaipui bik lo a, hun awl an neih remchanah thil chi hrang hrang an buaipui ve thin a. Thenkhat chuan an hun awlah rimawi lampang an buaipui nasa ve thin viau a ni.

Hun awl hnawh khahna atan hian Cristiano Ronaldo chuan bingo a khel thin a, Toni Kroos chuan dart vawm a hrat viau thung a. Tuina inang lo tak tak an awm fur a, rimawi ngaina deuh hi an awm ve nual a, chutianga rimawi lam buaipui thin thenkhat han thlir kual ila.

Alisson
Liverpool leh Brazil goalkeeper Alisson hian rimawi a ngaina hle a, Britpop ngainatu niin band zingah chuan Oasis a duh deuh ber a. Rimawi a ngainat avang hian guitar perh pawh a zir a, hla pawh a rem thei ve teuh a. Liverpool in an lak luh tirh khan an zaitir a, ‘Don’t Look Back In Anger’ tih a sa a ni.

Petr Cech
Czech legend hian goal veng thiam a nihna a larpui hle a, he mi piah lamah hian drums vuak a thiamna chu mi tam takin an hre tawh bawk a. Cech hian YouTube velah video a dah nual tawh a, rock hla thenkhat chu a lo vuak rem thin a, heng zingah hian Foo Fighters hla ‘Best Of You’ tih pawh a tel a. 2011 kumah khan a teammate Carlo Cudicini inah PlayStation game pakhat Guitar Hero a khel a, he mi hnuah hian drum set a lei a, a hun awl remchangah chuan a vaw nasa thei hle a ni.

Patrick Bamford
Leeds United striker Patrick Bamford chuan a naupan lai atang tawhin rimawi a ngaina thei hle a, sikul a kal chhoh thin lai atangin violin tum a zir thin a, piano pawh a tum thiam bawk a ni.

Alexis Sanchez
Chile forward Alexis Sanchez hi Manchester United in Arsenal atanga an lak luh tirh khan piano a tum lai video an tlangzarh a, a lar viau nghe nghe a. Video atan chauha piano tum der a ni lo a, a takah pawh piano tum chu a thiam hle a ni.

Slaven Bilic
West Bromwich Albion boss hlui Slaven Bilic hian hard rock a ngaina em em mai a, mi tam tak chuan Croatia ram Van Halen tiin an sawi nghe nghe a. 2008 kuah khan band pakhat Rawbau an tih chu a zawm a, anni hi Foo Fighters ang deuh an ni a, Bilic hian guitar a perh thin a ni.

Gareth Ainsworth
Wycombe manager hian rimawi a ngaina bawk a, band pawh a nei nghe nghe a. An band The Cold Blooded Hearts chu hmu hrang hrangah an zai thin a, anmahni pualin hla an phuah hran lo a, mi hla an sa kual thin.

Copyright © inkhel.com 2021. All rights reserved.