Flyweight-ah Garbrandt a chhuk

03rd August 2021, 02:08PM

UFC bantamweight champion hlui Cody Garbrandt chuan a weight tihniamin flyweight lamah a chhuk dawna, a flyweight bout hmasa berah Kai Kara-France nen an inhmachhawn dawn a ni.

Garbrandt leh Kara-France te hi kumin kum tawp December thla ni 11-a in fight tur an ni a, he UFC event hian hming a la neih loh bakah a hmun tur pawh tihchian a la awm lo.

MMA website rintlak te chuan Garbrandt leh Kai-te hian in fight turin inremna an neih tawh thu an tarlanga, UFC lam erawhin official-a an puanzar mai a la rinawm rih loh a ni.

11-0 record neiin a career tir lamah Garbrand hi che tha viau mahse, a fight hnuhnung pangaah vawi khat chiah a la chaka, a fight hnuhnung berah kumin May thla khan Rob Font chu unanimous decision-in a hneh lo.

Garbrandt-a’n flyweight lama a hmachhawn hmasak ber tur New Zealand mi Kara-France hian a fight hnuhnung berah Rogerio Bontorin chu UFC 259-ah khan knock-out hmangin a hneha, kum 28 mi Kara-France hian a fight hnuhnung pangaah vawi thum hnehna changin, vawi hnih a tlawm.

Kum 30 mi Garbrandt hian chak loh nei lova fight 10 a kal hnuah, kum 2016 khan UFC 207-ah Dominick Cruz hnehin, UFC bantamweight title a hlawhchhuaka, mahse Cruz a hneh hnu hian TJ Dillashaw lakah a title hloh leh nghalin, rematch nei zui bawk mahse Garbrandt hi a tlawm leh a ni.

Garbrandt hi tum angin bantamweight lamah a chet theih loh avangin a weight a tihniam dawna, hlawhtlinna beiseiin flyweight lamah a chhuka, December thlaah fiahna hmasa ber a hmachhawn dawn a ni.

Copyright © inkhel.com 2024. All rights reserved.