Manchester United chuan Erik ten Hag thlakna tur an dap mek nia report a ni a, Thomas Tuchel leh Zinedine Zidane-a hming te pawh lam rik a ni.
Ajax boss hlui hian Old Trafford a pan tirhin hna a thawk tha hle, beisei phak bakin United a vawrh. Mahse a season hnihnaah erawh a chet chhiatpui hle.
United hian tun season zet chu player inhliam an ngah, hei hi Erik ten Hag chuan a sawi chhuak fo. Chhuanlam tling a ni a, mahse club dang pawhin player inhliam an nei ve teuh tho a, a game khelhpui dan chu United hotute duhthusam a ni lo nia report a ni mek.
Tun season Champions League Group Stage an paltlang zo lo. Carabao Cup-ah an title an humhim zo lo a, Premier League table-ah 7-na an ni mek, Champions League pawh an beisei phak dawn lo niin a lang.
FA Cup-ah final an lut ve leh hlawl a, Final-ah Manchester City nen an inhmachhawn dawn. Erik ten Hag hian FA Cup final luhpui mah se a dinhmun a him chuang lo niin media te chuan an tarlang mek.
Semi final-ah Coventry City an hneh hram a, si thum faia hma an hruai hnuin an inrulhtir leh, penalty shootout hmangin an chak hram. United supporter te chu final an luh danah an lawm lem lo hle.
Hetih lai hian Erik ten Hag chuan thil zahthlak a awm loh thu leh, kum hnih chhunga FA Cup final an lut chu record tha tak a nih thu a sawi thung.
FA Cup-ah hian champion pawh ni se, United hotute chuan coach thar ngaihtuah an tum tho niin football pundit te chuan an tarlang.
Bayern Munich chhuahsan tur Thomas Tuchel chu United hotute hian an dawr niin English media te chuan an tarlang a, Real Madrid a chhuahsan hnua hna la nei leh lo Zidane pawhin United enkawl a chak thu a sawi chhuak niin English media te chuan an tarlang mek bawk.
Manchester United hian Erik ten Hag-a hnuaiah goal an khung tam thei lo. Tun season Premier League-ah game 32 atangin goal 47 chiah an khung a, goal 48 lai an chhuah bawk nen, an goal difference chu -1 a ni.
Premier League-ah vawi 15 hnehna an chang a, vawi 5 an khingpui an inhnehtawkpui a, vawi 12 an tlawm. An game khelh danah sang taka invawrh thei nia an lan loh avangin, United hotute chuan Dutch coach chu thlak mai an tum mek niin English media te chuan an tarlang a ni.