Europe khawmualpui chu khawvela football hmunpui ropui ber tia sawi a ni a, club ropui tak tak an awm teuh a, khawvel hmun hrang hrang atangin footballer ropui deuh deuh an fuan khawm nasa viau bawk a ni.
Khawvela football league ropui zual 6 (Premier League, La Liga, Serie A, Bundesliga, Primeira Liga, Ligue 1) te chu Europe khawmualpuia awm an ni hlawm a. Hei bakah hian khawvela club inelna ropui ber pawl UEFA Champions League leh UEFA Europa League te pawh a la awm cheu a ni.
Football club thahnem tak zingah khawvel huapa ropui tia sawi theih eng emaw zat an awm a, Real Madrid, Barcelona, Manchester United, Manchester City, Liverpool, Bayern Munich tih te leh a dang thahem tak an la awm a. Hetiang club ropui tam tak zinga football club hlawhtling zual tia sawi theih, trophy la hnem deuh hlek panga thlang chhuak ila.
5. SL Benfica
Portugal rama football club hlawhtling ber SL Benfica chu European club hlawhtling zual 5 thlan chhuah zingah an tel a, 1904 atanga an din atanga tun thlengin Benfica hian trophy 80 zet chu an la tawh a ni.
1940 chho leh 1980 chhoah khan Benfica hi an che tha thei hle a, 1990 bawr leh 2000 bawr vela FC Porto an vung chhoh takah khan an tlahniam ve ta a. Tun hnaiah hian Primeira Liga lamah chuan an invawrh chho leh nasa tawh hle.
Trophy an lak tawhte chu UEFA Champions League trophy 2, Primeira Liga trophy 37, Portuguese Cup 26, Portuguese League Cup 7 leh Portuguese Super Cup 8 te an ni.
4. Real Madrid
Trophy hmanga tehnaah Spanish club lian Real Madrid chu palinaah an awm a, heti chung hian khawvela club hlawhtling ber tia sawi an ni tho a ni. An club din atanga tun thlengin Los Blancos hian trophy 92 an la tawh a ni.
Real Madrid hian UEFA Champions League trophy vawi 13 zet an la tawh a, La Liga title pawh vawi 34 lai an la tawh bawk a, heng inelna pahnihah hian record siamtu an ni a. 1990 chhoah khan Galacticos hi an tlahniam ve deuh hlek hman a, tunah erawh dinhmun sang takah an ding leh tawh a ni.
A zawna European Cup vawi 5 la thei Real Madrid hian 2016, 2017 leh 2018 ah khan UEFA Champions League trophy chu an la zawn leh bawk a. Tar lan tawh angin UEFA Champions League trophy vawi 13 an lak tawh bakah La Liga title vawi 34 an la tawh bawk a. Heng bakah hian Copa del Rey 19, FIFA Club World Cup 4, Spanish Super Cup 11, UEFA Cup 2, Intercontinental Cup 3, UEFA Supercup 4, Copa Eva Duarte 1 leh Copa de la Liga 1 te an la tawh a ni.
3. Barcelona
Anni hi season khata trophy pathum la nawn thei hmasa ber an ni a, 2009 leh 2015 ah te khan trophy pathum ve ve an la thei a. Catalan club hian khawvela football player tha ber berte an kawl thin a, khawvel hmun hrang hrang atangin pawisa tam tak sengin footballer tha an lawr khawm nasa thei hle.
An hmelma club Real Madrid chuan kum zabi 20-na chhoah khum nasa viau mah se trophy lak hnem lamah hian Barcelona chu an chungnung zawk a. An club din tirh atanga tun thlenga trophy an lak tawh chu 95 niin, Real Madrid aiin trophy 3 in an sang chiah a. Champions League leh La Liga lamah Los Blancos chu tluk lo mah se Copa del Rey lak hnem lamah chuan an khum chiang ve hle a, he trophy hi vawi 31 an la tawh a, Real Madrid aiin 12 in an la hnem tawh zawk a ni.
2. Celtic
An khelhna hi league sang tia sawi tur chu a ni hauh lo a, chuti chung chuan trophy lak hnem lamah pahnihna an ni thei a. The Hoops hian hun eng emaw chen chu Scotland ramah ro an rel a, 2012 atanga 2020 chhung khan a zawnin vawi 9 chu an champion hman a ni.
Celtic hian European Cup (tuna UEFA Champions League kan tih) trophy chu 1967 ah khan an lo la ve tawh a, 1970 ah khan pahnihna an ni bawk a. An club hian Scottish Premiership title vawi 51 an la tawh a, Scottish Cup vawi 40 la tawhin, Scottish League Cup vawi 19 leh European Cup trophy vawi 1 an la tawh a. Trophy hi 111 zet chu an la tawh a ni.
1. Rangers
Glasgow khaw club hian tun thlengin trophy 120 zet an la tawh a, hei vang hian Europe khawmualpuia football club zingah chuan hlawhtling bera thlan an ni a. An manager, Liverpool legend Steven Gerrard kaihhruaina hnuaiah season hman zawh takah khan league title an la a ni.
League hniam lamah te pawh lo khel ve tawh Rangers hian tun thlengin Scottish Premiership title 55 an la tawh a, Scottish Cup 33, Scottish League Cup 27, Scottish Challenge Cup 1, Scottish Fourth League Trophy 1, Scottish Third League Trophy 1, Scottish Second League Trophy 1 leh European Cup Winners’ Cup 1 te an la tawh a ni.