Euro 2020 khelh mekah, Italy chuan an game hnihna khelin, Switzerland nen Stadio Olimpico-ah an inhmachhawna, Italy hian si thum faiin hnehna changin, tun Euro-a Round of 16 lut hmasa ber an ni.

Group A inkhelah hian Italy tan Sassuolo midfielder Manuel Locatelli chuan goal hnih a khunga, Lazio striker Ciro Immobile chuan goal khat a khung ve bawk.

Italy hian game hnihah point 6 an hlawhchhuak tawha, group stage inkhelah game khat chiah nei tawhin, group A hmahruaitu niin group stage an khelh zawh a rinawm hle a ni.

Gli Azzurri inkhel hi a hmuhnawm leh pek hle a, an game hmasa berah Turkey hmachhawnin, inkhel hmuhnawm tak min hluia, Switzerland lakah a aia hmuhnawm min hlui leh.

Italy hi kum 2018 World Cup-ah khan an inpet tling zo lova, hemi hnu hian Manchester City manager hlui Roberto Mancini chu an head-coach atan ruaiin, siam thar lehna an chang nasa hle a, an inkhel a hmuhnawma, an defence phui tluk zetin an tlarhma lam an hlauhawm, goal khung an harsat lo hle bawk.

Italy hian inkhel an thunun tluana, Switzerland lam hian chance nei ve leh zauh thin bawk mahse, an tan Italy an tha mah mah a ni bera, Italy hian harsatna em em tawk lovin Round of 16 an lut a tih theih awm e.

Italy hian 20mins velah goal an khung zeta, corner atanga Insigne ball vawrh luh chu Italy captain Giorgio Chiellini chuan goal-ah lo khung mahse, VAR-a endik a nih hnuah Chiellini hi a handball avangin an goal hi sut leh a ni.

A goal pawm sak a nih loh hnu lawkah Juventus defender kum 36 mi Chiellini hi a inhliama, hamstring injury niin lakchhuak a ni a, aiah Lazio centre-back kum 33 mi Francesco Acerbi dah luh a ni.

Italy hian an captain chhuah hnu lawkah hma an hruai zui nghala, Berardi chuan dinglamah chak takin ball a khalha, Switzerland box chhungah ball khalh lutin, tha takin goal hmazawnah ball a pe pheia, Locatelli chuan chiang takin goal-ah a rawn pet luta, si khat faiin Italy hma a hruaipui.

1-0 hian first half a tawpa, second half an tana, minute sawm pawh an khelh hma in Italy hian goal khung leh nghalin, goal khungtu hi kum 23 mi Locatelli bawk a ni a, box pawn atang mawi em emin goal-ah ball Locatelli hian pet lutin, 2-0 in Italy in hma an hruai.

Italy hian an hman chang changin Switzerland defence an thiat emaw tih mai tur a ni a, goal hnih dang vel khung leh pawh nise a awm lo hran lovang. 2-0 a nih reng hnuah Italy hian 90mins dawnah an goal thumna an khunga, Italy goal thumna khungtu hi season liamtaa Serie A lama goal 20 khung thei, kum 31 mi Immobile niin, ani pawh hian yard 20 vela hla atangin Switzerland goal-ah ball a pet luta, 3-0 in Italy hian hnehna an chang ta a ni.

Italy 3-0 Switzerland

(Locatelli 26’, 52’, Immobile 89’)

Player Ratings