Euro 2020 Round of 16 inkhelah Spain leh Croatia te an inhmachhawna, team hnihte hian inkhel hmunawm tak min hmuh tira, Spain hian 5-3 ngawtin hnehna an chang.
Goal riat lai luhna inkhelah hian Spain leh Croatia te hi 90mins chungin 3-3 in an inhnehtawka, Extra Time khelh niin, ET-ah hian Spain lamin goal hnih an khung belhin, Quarter Final khel turin an inpet tling ta a ni.
Spain tan hian Pablo Sarabia, Cesar Azpilicueta, Ferran Torresm Alvaro Morata leh Mikel Oyarzabal-te chuan goal khat vek an khunga, Croatia tan hian Mislav Orsic leh Mario Pasalic te chuan goal khat ve ve an khung baka, Spain midfielder Pedri chu a own-goal bawk.
Spain lam hian bul an tan tha zawka, chance pawh an insiam thei zawk. 15mins vel khelh a nihin Croatia box chhunga awm Koke chuan veilam atangin ball tha tak a hmu a, hnai te atangin Koke hian chance nei mahse Croatia goalkeeper Livakovic chuan a ke in a lo save. Minute nga hnu vel lawkah PSG winger Sarabia chuan Spain tan chance a siam chhuak ve leh nghala, dinglam atanga a cross tha zet chu Morata-a’n goal hnih tawk atangin lo tauh mahse Morata hian a tauh chhe hle a, eng mah lovah a chhuah zui.
Morata chance hlah hnu lawk hian Spain-in si an phur zuia, Pedri chuan midfield atangin an goalkeeper Unai Simon chu a back-pass a, Athletic Bilbao keeper hian ball hi lak thelhin, an goal-ah a lut zuia, Pedrid-a own-goal a ni a, Croatia-in hma an hruai phah.
40mins hma lawkin Spain hian an si phurh an suta, veilam atanga Jose Gaya shot tha zet chu Croatia keeper chuan a lo beng pera, box chhunga awm Sarabia chuan ball hi chang zuiin, goal-ah a pet luta, 1-1 a ni a, first half-ah goal dang a lut tawh lo. 1-1 in second half an khel tana, darkar khat khelh tlin a nih hma deuhin Spain lam hian hma an hruaia, Torres-a’n veilam atanga Croatia box-a ball a cross luh tha tak chu Chelsea captain Azpilicueta chuan hnai set sawt atangin goal-ah a lo tauh luta, 2-1 in Spain hma a hruaipui.
70mins chuang an khela, Spain hian half line bul lawm mual veilamah freekick an hlawhchhuak. Freekick atang hian mual dingalama awm Torres chu ball pek a ni a, Croatia defender-te inthlahdah lai an nang fuh. Torres hian box-ah ball um lutin, nalh takin a la a, goal-ah pet lut zuiin, 3-1 in Manchester City player hian Spain hma a hruaipui.
80mins an khelh chho a, Croatia lam hian Spain nawr viau mahse goal an khung lawk thei lo. Torres-a goal khung atanga minute sawm hnu velah Croatia hian goal an rawn khunga, goal khungtu hi Orsic niin, Coatia lamin beiseina thar an nei. Croatia an phur tulh tulha, Spain an nawr na hle a, injury time-ah goal dang an khung leh ta nge nge a, Orsic-a’n veilam atanga Spain box-a ball a pek luh chu Pasalic chuan goal-ah lo tauh lutin, 3-3 a ni a, Croatia-in an si phurh an sut zo.
Extra Time an khel chho a, Croatia lam an tal na nghal viaua, chance pawh minute ruk vel khelh a nihin an nei nghala, mahse first half-a che fuh lo em em Spain goalkeeper Simon an paltlang thei lo a ni ber. Kum 24 mi Simon hi first half-ah mualpho hle mahse a khel tha zui em em a, save pawimawh tak tak a nei nual.
Minute za na chiahah Spain hian hma an hruai a, dinglam atangin a kangin Croatia goal far post lama awm Morata chu ball pek a ni a, Morata hian a ke dinglamin ball a lo la thla a, a ke veilamin mawi takin goal-ah ball pet lutin, 4-3 in Spain-in hma hruai. Spain hian goal an khung zui leh deuh nghal maia, Olmo leh Morata te dinglamah ball an inpe a, Olmo hian hniam teah Oyarzabal-a tan ball cross pheiin, Oyarzabal hian harsatna em em awm lovin goal-ah a lo chan tir zuia, 5-3 a ni.
ET half time a zawh hnu lawkah Croatia lamin chance an nei nghala, mahse an chance neih tha tak an hlah. Croatia lam an chaua, squad nei chhah lo zawk an ni tih a lang chiang. A tawp lamah Spain an nawr hleithei tawh lo, Spain erawh an la tlan thei phian a tih theih awm e. 120mins-ah Spain hian goal an khung belh teuh hle a, Olmo chuan si ban a pet per ve leh. Goal a luh belh tawh lova, 5-3 hian inkhel a tawp ta a ni.
Croatia 3-5 Spain
(Pedri 20’OG, Orsic 85’, Pasalic 90+2’) (Sarabia 38’, Azpilicueta 57’, Torres 76’, Morata 100’, Oyarzabal 103’)
Player Ratings