Ek-a’n Arsenal neitu te a be tawh: Henry

04th May 2021, 10:05AM

Music streaming service lar tak Spotify neitu Daniel Ek chuan Arsenal lei a tum thu leh, man tha taka Arsenal neitu Kroenke chhungkua chu a dawr tur thu a sawi tawha, Arsenal striker hlui Thierry Henry chuan Ek-a thusawi hi a nemngheh sak bawk.

Ek-a hian Arsenal lei na tur sum pawh a chinfel tawh thu a sawia, Arsenal tan tu a nih reng thin thu pawh sawiin, Arsenal legend hlui pathum Henry, Dennis Bergkamp leh Patrick Vieira te puihna nen Arsenal lei a tum thu pawh a sawi tawh.

Kroenke chhungkaw zing mia Stan Kroenke chuan Arsenal hralh an tum loh bur thu a sawi ve tawh bawka, Arsenal tan an la inpumpek thu leh, Arsenal lei tumtu an awm a nih pawhin an bengkhawn dawn loh thu a sawi ve tawh bawk a ni.

Kar hmasa lam khan Ek hian pound 1.8 billion-in Arsenal lei tumna a theh luh thu a sawi tawha, mahse Arsenal neitu te lam hian an lo bengkhawn sak dawn em a sawi theih loh.

Arsenal hi European Super League-a tel zetin, dodalna a nasat em avangin inhnukdawk leh mahse, fans lam chu an club neitu te lakah an lung a la awi thei lova, Kroenke chhungkua chu Arsenal hralh turin an nawr mek.

Henry chuan, “Arsenal lei chhawn chungchang hi miin an hre chak tih ka hria. Daniel-a’n Arsenal tantu a nih reng thin a sawi hi thudik a ni ngeia, mipui te hriat tura sawi liam mai chauh a ni lova, hun rei tan Arsenal tantu a ni tawh.

“Ka'n sihhmuh che u anga, Daniel hian Arsenal neitu te hi a be tawh ngeia, amah ngeiin Arsenal leina tur sum a tihfel tawh thu leh man tha taka dawr a tum thu a sawi tawh bawk. Tunah chuan Arsenal neitu te lam hian an ngaihthlak sak a ngai tawha, mi tam takin tuna neitu te hi chhuak turin an nawr mek. Tunah hian fan-te duhna chinfel dan tur kan dap meka, Arsenal nihna diktak neih let leh kan tum. Inbiakna a awm a ngaia, mahse Daniel hi chuan lei a duh thu a hrilh hre tawh ngei a ni,” a ti.

Sawi belhin, “He thil hi a thleng a nih ngai pawhin, thil duh rei tur leh awlsam lo tur tak a ni a, chiang taka ka sawi duh pakhat chu Daniel hi a hawi kir dawn lova, Arsenal hi an hralh duh leh hralh duh loh a ngaihven reng dawn. Hei hian hun a duh rei dawna, kan thil tih duhah kan chianga, mahse a pawimawh ber leh a hmasa ber chu an bengkhawn a nih chuan lei chhawn phawt a ngai a ni,” a ti bawk.

Copyright © inkhel.com 2021. All rights reserved.