English winger Stewart Downing chuan kum 37 mi niin inkhelh a chawlhsan thu a puang ve ta.

Professional footballer anga kum 20 zet hun a hman chhungin Downing hian game 725 lai a khel hmana, a ram England tan vawi 35 a inlan hman bawk.

Downing chuan inkhelh a chawlhsan chungchang Sky Sports hnenah sawiin, “Season liamta atang khan inkhelh chawlhsan chungchang hi ka rilruah a awm tawha, tun hi a hun tak niin ka hria. Season liamta khan Blackburn-ah ka luta, khami season kha ka season tawpna ber tur a nih hi ka ring ru reng tawh a ni.

“Hun hlimawm leh lawmawm tak tak thlir kir tur ka neia, chung zawng zawng zingah chuan England tan ka khel thei kha ka ngaih hlut ber a ni. England tan ka khel kha keimahah chuan a langsar bera, World Cup-ah ka ram tan ka inlana, ka tan chuan thil liantham tak a ni.

“England tana khelh kha nuam ka ti em em a, ka khelh zat aia tam khelh pawh chak viau mah ila a rem ta lova, mahse ka khel nual thei kha ka awm hle a ni,” a ti.

Downing hi Middlebrough academy chhuak a ni a, ke veilam hmang thiam tak niin, kum 2001 atang khan Middlesbrough senior team lamah a inlan tana, kum 2009 thleng awmin, vawi  234 lai a inlan hman.

Premier League atanga Middlebrough an tlak hnuah, kum 2009 khan Downing hian Aston Villa a pana, kum 2011 khan Liverpool-in an lalut ve leh. Liverpool atang hian West Ham-ah loan in a khela, kum 2015 khan Middlesbrough-ah bawk kir lehin, Teesside club tan hian game 170 dang a khel leh bawk.

Middlesbrough chungchang sawiin Downing chuan, “Middlesbrough chungchang hi a tha lam bak sawi tur ka nei lova, ka seilenna khaw club an ni. Tum hnih ngawt Middlesbrough-ah ka lut thei hi ka vannei hle a, ka naupan tet atanga ka chak ber chu Middlesbrough tana khelh hi a ni.

“Ka duh ber ka tihlawhtling thei hi a mak ka ti zawka, kar tin mai ka chhungte leh ka thiante hmaah ka inkhela, ka tan chu chu a phur awmin a hlu em em a, a chhuanzawm ka ti takzet bawk a ni,” a ti.