WBC interim heavyweight champion lai Dillian Whyte tun thla hian Otto Wallin hmachhawn tur ni mahse, a dar a tihnat avangin he fight hi a tlawlh rih.

British boxer Whyte leh Swedish boxer Wallin te hi tun thla ni 30 hian London a 02 Arena-ah inbei tur an ni a, heta chak zawk zawk hi WBC heavyweight champion Tyson Fury-a mandatory challenger ni dawn mahse, he fight hi sawn hlat a ngai dawn.

Whyte hian a dar hi a tihnatna a rei leh deuh tawh a, mahse tun kar Thawhtanni khan a zual avangin a inhnuhdawh a ngai ta tih Whyte-a team lam hian an sawi.

Whyte chuan, “Ka dinhmun a tha in camp tha tak ka nei bawka, mahse ka inhnuhdawh a ngai hi pawi ka ti hle. Wallin-a knockout hun ka nghakhlel em em a, kan fight tir lamah ka knockout ngei dawn bawk a ni,” tiin a sawi.

Eddie Hearn chuan, “Dillian hian kar hnih liamta vel atang khan dar na a nei tawh a, mahse Thawhtanni khan sparring-naah a rawn zual a, a tan in fight ngaihna a awm lo a ni,” tiin Whyte-a inhliam chungchang a sawi ve bawk.

October ni 30 hian main event tur Whyte vs Wallin a tlawlh tak avangin Chantelle Cameron leh Mary McGee te hi main event an ni dawn ta a, anni hi hmeichhe WBC, IBF leh Ring Magazine super lightweight unification atan an inhmachhawn dawn a ni.