Dembele-a’n Newcastle a zawm hreh lo

21st October 2021, 11:10PM

Barcelona forward Ousmane Dembele chuan nakkumah Newcastle United zawm a hreh lo niin Goal chuan a tarlang.

Dembele hian tun season daih bak Barcelona-ah contract a nei tawh lova, nakkum nipuiah French forward hi free agent a ni thei dawn a, Newcastle tan lakluh a harsa dawn lo niin a lang.

Newcastle hian player tha lakluh tur nakkum January thla atangin an melh tan ngei dawn a, Financial Fair Play venthawn tur a awm bawk nen duh angin sum an seng tam nghal ngawt thei dawn lova, free transfer-a Dembele lakluhna hun tha an neih chuan theihtawp an chhuah ngeiin a rinawm hle.

Spain-a report thenkhat chuan Newcastle leh Dembele-a agent te an inbe tan tawh niin an tarlang a, Newcastle hian kum 24 mi hi kum khatah euro maktaduai 15 vel hlawh tira, kum nga daih contract ziahpui an inhuam niin sawi a ni bawk.

Barcelona hian Dembele hi contract thar zawrh mahse Dembele hian contract thar a la ziak duh lova, Barcelona pawh hian a duh lo chung chu Dembele hi thlem lungawi an tum bik lo nia sawi a ni.

Kum 2017 khan Barcelona hian Borussia Dortmund atangin Dembele hi an lei a, Dembele hian Barcelona tan game 118 a khelh tawh atangin goal 30 a khung tawh a, Euro 2020-ah khan a inhliam avangin tun season-ah Barcelona tan a la inlan lo a ni.

Copyright © inkhel.com 2024. All rights reserved.